كيف حالكم أحبتي

عموما كل عام و انتم بخير و عساكم من عواده

حبيت أطرح تصويت و أستفسار مهم جدا بالنسبة لي ، خصوصا أني أخطط لطرح سلسلة دروس قادمة إن شاء الله طبعا مش بكرة ولا بعد أسبوع حطبخها صح هالمرة إن شاء الله و أنفذها كلها ثم أنزلها إن شاء الله .

أستفتاء

في البداية أبا أخذ رأيكم في سلسلة البن تول صارت أسهل

n

كمان اتمنى تعطوني أقتراحاتكم و رأيكم من خلال التعليقات أيش الي ماعجبكم و أيش الي تقترحونه زيادة ؟

كل ما ساعدوتني أكثر و اديتوني رأيكم بصراحة كل ما قدرت أوصل لمستوى أفضل في طرح الدروس .. لأجلكم
* الي ما قد شاف الدروس يطلع عليها ويديني رأيه بعد تفحص طويل إذا سمح .

أستفسار

لو كنت مبتدئ في الفوتوشوب أو لسى حتخش التصميم ..

أو لو كنت مصمم ويزعجك تشوف مصممين زي الرز في الساحة لكن بدون ما يفهموا المعنى الحقيقي للتصميم ..

لو كنت تعرف أحد يبغى يتعلم تصميم ..

أتمنى تعطيني أفكارك أو أيش الي تبغى تعرفه كبداية حول مجال التصميم بشكل عام و حول الفوتوشوب بشكل خاص !

* لا أقصد هنا أيش الدروس الي تبغاها .. لطلبات الدروس من هنا الي أقصده أستفسارات حول المجال و البرنامج بشكل عام.

تقريباً هذا الي أبغاه حاليا منكم و أتمنى والله تتفاعلون معايا شوية عشان أقدر أنفذ الدروس الجاية بحترافية إن شاء الله

محبكم دوماً و أبداً

عبدالله .. والأقر على الله

الدرس الأول : الـ Pen Tool صارت أسهل ! : المتجهات / Vectors

الدرس الثاني : الـ Pen Tool صارت أسهل ! : الأوضاع

الدرس الثالث : الـ Pen Tool صارت أسهل ! : المستقيمات

الدرس الرابع : الـ Pen Tool صارت أسهل ! : مبادئ المنحنيات

- – - – - – - – - – - – - – - – - – - – - – - – - – - – - -

اليوم مافي درس  .. بل تمهيد للدرس القادم إن شاء الله

حتى أتأكد من أستيعابكم وفي نفس الوقت تتمرنون أكثر على التعامل مع المنحنيات و النقاط

بأستخدام الأداتين

Convert Point Tool

Direct Selection Tool

التمارين بسيطة إن شاء الله ، لكن عليها شروط + تمرين من عندكم وهو الأهم

هذه رسومات بسيطة بالبن تول على شكل ” مستقيمات ” أبغى كل واحد يسوي لها منحنيات بالي يشوفه مناسب

يعني نعتمد هنا على ذوقكم مافي شي محدد تقدروا تغيرون حتى أماكن النقاط الأمر راجع لكم .

وبإمكانكم لو أحببتم

تضيفون 3 نقاط كحد أقصى

تحذفون 3 نقاط كحد أقصى

طبعا الحذف أو الإضافة لما ترونه مناسب ومو شرط الحذف أو الإضافة

أضغطوا على كل صورة لتحميل ملف الـPSD

* تحديث : الشكل الأخير خلوه مثل ماهو يعني التغيرات تكون طفيفة فقط

التمرين الأخير أبغى شكل من عندكم يكون في البداية ” مستقيمات ” بعدين تعملون له ” المنحنيات “

وصدقوني حبة حبة وراح يتحسن مستواكم

أتمنى ماتتأخرون في التطبيقات

في أفكار كثيرة لكن تعتمد على مدى جديتكم في التعلم

جميع الحقوق محفوظة لـAbdullah Saeed- www.asaeed.ws

[ الرجاء ذكر المصدر عند النقل ]

Enjoy

الدرس الأول : الـ Pen Tool صارت أسهل ! : المتجهات / Vectors

الدرس الثاني : الـ Pen Tool صارت أسهل ! : الأوضاع

الدرس الثالث : الـ Pen Tool صارت أسهل ! : المستقيمات

- – - – - – - – - – - – - – - – - – - – - – - – - – - – - -

خلونا ناخد لفة على الي شرحناه في هذه السلسلة

في الدرس الأول تعرفنا على المتجهات أو الـ vector وعرفنا بساطتها وسهولتها وفوائدها كمان .

في الدرس الثاني تعرفنا على أوضاع الرسم الي ممكن نستخدمها

مع هذه الأداة الرااااائعة و السهلة كمان

وعرفنا في البداية الفرق بين الـ pen tool و  الـ path tool .

في الدرس الثالث عرفنا كيف نرسم المستقيمات وتعرفنا على بعض الأسرار الي راح تفيدنا بشكل كبير في الرسم .

* ملاحظة : أنا مسوي الدروس على شكل متسلسل ، عشان تفهم وتستوعب صح لازم تقراها من البداية

لو منت راعي قرايه وماتهمك المعلومة الدقيقة أو مافهمت راجع هذا الدرس : أحترف الـ Pen Tool

- – - – - – - – - – - – - – - – - – - – - – - – - – - – - -

طلبت منكم سابقاً رسم قلب مثل هذا بالضبط :

وماشاء الله 500 واحد رسموه عشان كذا جبتوا لي الصمرقع وين الدرس الي بعدوا وين الي بعدو

طيب نبدأ درسنا هذا بضبط إنحناءات القلب ، ولا أخفيكم سرا أنو الدرسين الجايين كمان يعتمدون على هذا القلب

* القلب حصل عليه بعض التعديلات أرجعوا أرسموه .

في البداية نفعل الشبكة زي ماتعلمنا في الدرس الثالث

الآن نبغى نسوي مستقيم بسيط جدا من 3 نقاط بس

بكل بساطة .. طيب رسمنا دحين مستقيم نبغى نحول هادا المستقيم إلى منحنى بسيط

كيييف ؟؟

راح نستعمل أداتين أعتبرهم شيء أساس في التعامل مع الفكتور /Vector

Convert Point Tool : هذه الأداة خاصة بإنشاء وتعديل المنحنيات ، الأداة هذه تؤثر مباشرة في المسار / Path مستخدمةً النقاط  كمحور أو نقطة أرتكاز لذراعا التحويل .

هذا تصور بسيط لمسار مستقيم مكون من 3 نقاط نلاحظ مع بعض الأذرع الي تقوم أداة الـ Convert بالتأثير عليها وبالتالي يتأثر المسار تبعاً للأذرع .

نلاحظ كيف يتأثر المسار مع تحريك الأذرع عن طريق الأداة

في البداية كنا شغالين على أداة الـ Pen Tool فجأة تحولت الأيقونة لأيقونة الـ Convert لأني كنت ضاغط زر Alt من الكيبورد .

Alt يقوم بتفعيل أو التبديل بين الأداتين ( Convert << Pen Tool ) أو بالإمكان أختيارها مباشرة من قائمة أدوات البن تول .

ملاحظة :  تتفعل الـ Convert عند المرور بالنقطة فقط .

لاحظوا في الصورة التالية أن قمة المنحنى تتبع نقطة الذراع

أرجعوا شوفوا الصورة المتحركة الأولى  وراح تلاحظونها أكثر .. إذاً المنحنى يتحرك تبعاً للأذرع والأداة الي نقدر نتحكم بها في الأذرع هي الـ convert .

Direct Selection Tool : هذه الأدة مهمتها تحديد النقاط بكل بساطة وسلاسة وفي نفس الوقت تحدد الأذرع نشوف مع بعض كمان :

لاحظنا كمان أنو الاداة هذه تقوم مقام الـ convert عندما تكون الأذرع مُفعلة !!

واااو يعني نضرب راسين بشاكوش واحد

كمان لاحظنا أنو نقدر نلعب بذراع ( أ )  نكبر ونصغر بدون ما يتأثر الذراع ( ب ) وهذا الشيء يعطينا آفااق أوسع في الرسم ، كمان راح نتعلم لاحقاً أختصارات في الرسم حتسهل العملية بشكل رائع جداً.

لاحظنا كمان أنو أستخدمت زر Shift الزر هذا وظيفته هنا كما هي وظيفته في غالب البرامج يقوم بتحديد أو إضافة  أكثر من عنصر في نفس الوقت يعني لاحظنا اني أقدر احدد ذراع دون آخر و ألعب فيه

وفي نفس الوقت أقدر أحدد الذراعين وكمان كم نقطة وو .. وزي ماعرفنا في الدرس السابق انه يساعد على استقامة المسار أو حتى الأذرع .

ملاحظة مهمة : الأداتين متلازمتين ، إذا أخترت الـ convert مباشرة من قائمة الادوات راح تظهر لك أداة الـ Direct Selection وبمجرد المرور على النقطة تتحول إلى convert .

طيب دحين بعد ماتعرفنا على الأداتين بشكل مكثف نشوف مع بعض شوية تجارب في المنحنيات

نجي دحين لتحليل المقطعين

واضح أني أستخدمت الاداتين Direct Selection & convert بشكل كبير والتنقل بينهم يكاد يكون متعاقب و سريع

كان ذلك بالتبديل بين الثلاث أدوات عبر الأختصارات على الكيبورد

Pen Tool : P

convert : P+Alt

Direct Selection : A

الأختصارات جدا جدا مهمة ودائما أقول المصمم الذكي يعرف كيف يستغلها لتسهيل المهمة 

لاحظنا كمان في الصورة الثانية أو اللقطة الثانية أنو في أدوات أستخدمتها لإضافة و حذف النقاط

: إضافة نقطة جديدة للمسار

: حذف نقطة من المسار

هذه الأدوات مهمة جدا ، ولاحظنا أني بمجرد المرور على نقطة موجودة أصلا تظهر إشارة الحذف ، ولو مريت في المسار تظهر إشارة الإضافة .

لاحظنا كمان أنو بعض الأحيان كثرة النقاط تسبب تشوه للشكل المرسوم

وهذا راح يكون محور حديثنا في الدرس السادس من سلسلتنا ، كيف نرسم بعدد نقاط أقل وهذه هي الإحترافية بخشمها  !! احم قصدي .. هذه الأحترافية بعينها  !!

ركزوا كثيراً في اللقطتين مرة ومرتين وثلاثة وجربوا مليون مرة لا تقولوا مافهمنا من مجرد قراءة !! الممارسة تثبت المعلومة أكثر و أكثر

واجب هذا الدرس أبغاكم تعملون منحنيات للقلب حقنا ، وهذه صورة متحركة لطريقة العمل عشان خاطر عيوناتكم الصفرا  <<  تخيلوا واحد عيونه صفراء

* في حاجة ماكان لها لزمة سويتها متعمد ممكن تعرفوا أيش هيا ؟؟

نصيحة في الآخر : صدقني عمرك مارح تتعلم هذه الاداة لو حطيت في راسك أنها صعبة ، أو جلست تقرأ هالمعلومات بدون ماتطبق .

الدرس القادم سيكون في أحتراف المنحنيات وكيف نرسمها مباشرة بدون رسمها كمستقيمات في البداية ، والحمدلله ماعمري أستخدمت المستقيمات مع المنحنيات على طول دخلت في الغويط

الغويط : العميق ، عشان ما أحد يروح باله حاجة كدا ولا كدا ههههههههه

جميع الحقوق محفوظة لـAbdullah Saeed- www.asaeed.ws

[ الرجاء ذكر المصدر عند النقل ]

Enjoy

الدرس الأول : الـ Pen Tool صارت أسهل ! : المتجهات / Vectors

الدرس الثاني : الـ Pen Tool صارت أسهل ! : الأوضاع

- – - – - – - – - – - – - – - – - – - – - – - – - – - – - -

عشان ماتطول المقدمة و أنو أشتقت لكم و .. إلخ خلونا نخش في درسنا دغري 

اليوم راح نتكلم عن رسم المستقيمات فقط !! مع توضيح بعض النقاط المهمة في عملية الرسم .

قبل مانخش في الرسم ، لازم نتكلم عن نقطة مهمة جدا وراح تساعدنا في الرسم بأداة الـ Pen Tool

|[ الأستعداد ]|

حتى يكون رسمنا أكثر دقة - مستقبلاً مارح تحتاجونها – راح نفعل إضافة مميزة جدا في الفوتوشوب الي هيا الشبكة / Grid

وهذه صورة بسيطة حتى نعرف من وين نقدر نفعلها :

نلاحظ انو اختصار الإضافات Ctrl + H هادي مهمة لازام نحفظها  ، طبعا هي مجموعة من الإضافات تساعدنا في الرسم حالياً راح نحتاج الشبكة فقط و أختصارها مباشرة ‘ + Ctrl أو ط + Ctrl راح يصير ملف العمل عندنا بهالشكل :

* لإلغاء الإضافة أضغط نفس الأختصار ‘ + Ctrl أو ط + Ctrl

|[ أداة الرسم الحر ]|

شرحنا فيما سبق الخيارات باللون الأحمر ( 1 ، 2 ، 3 )

اللون الأخضر بكل بساطة  :

4 – أداة الـ Pen Tool : مايحتاج لها فتاكة  هي الأداة نفسها الهرجة في الي بعدها .

5 – أداة الرسم الحر Freeform :

هذه طال عمركم الكل يعلم أنو أداة البن تول أسهل في الرسم و أكثر دقة و تحكم من الفرشاة مثلاً !

فا بهذه الأداة نقدر نرسم مسار / Path بشكل حُر يعني كأننا نتعامل مع الفرشاة ، و الفوتوشوب راح يحط لنا نقاط المسار تلقائياً !

مو أول كنا أحنا نرسم النقاط أول عشان يتكون لنا المسار ؟ الحين احنا نرسم المسار وهو يحط لنا النقاط على حسب رسمنا و المنحنيات فيه  ، نشوف مع بعض صورة متحركة تشرح الفكرة ..

قبل ما أوريكم الصورة ، أحب أنبه أنو نقدر نرسم بالوضع القياسي Shape Layers أو حتى بالوضع الرسومي Path .

[ لمزيد من المعلومات حول الأوضاع راجع الدرس الثاني من هنا ]

ملاحظات :

* نلاحظ أنو لمن نرسم يحاول يعدل لنا الرسم بحيث يكون أنعم - ستلاحظونها في Illustrator بشكل أكبر - .

* نلاحظ أن النقاط توزعت مو بعشوائية بل حاول الفوتوشوب يتعامل مع المنحنيات الي رسمناها وحط النقاط على أثرها .

* هذه الأداة يستفيد منها بشكل أكبر الرسامين الذين يستخدمون القلم الضوئي / Tablet حيث الرسم يكون أدق .

[ يقدر أحد يقول لي في أيش ممكن نستفيد من هذه الأداة  ؟ ]

|[ رسم المستقيمات ]|

راح نبدأ الآن برسم المستقيمات ، بعد مافعلنا الشبكة ، تابعوا معاي هذه الصورة المتحركة و أنا أرسم مربع :

شايفين سهولة الرسم مع ” الشبكة ”  طيب دحين راح نشرح الأيقونات الي ظهرت لنا  :

: الأستعداد لبدأ رسم جديد ، لاحظنا أنو أداة البن تول عند بداية الرسم وعند نهاية الرسم تتحول لهذا الشكل .

: هذه تعبر عن آخر نقطة تم رسمها و أنت لسى قاعد ترسم يعني مالها تأثير مجرد إشارة مثل الأولى .

: النهاية و إقفال المسار ، زي ما لاحظنا أنو لمن رجعنا لنقطة البداية لإقفال المربع جاتنا هذه الإشارة .

* حتى نقفل المسار نحتاج نرجع لنقطة البداية ( نقطة البداية هي نفسها نقطة النهاية )

* باقي أدوات لكن نذكرها في وقتها إن شاء الله .

طيب نجرب نرسم بدون الشبكة ولكن هالمرة راح نرسم مثلث :

لاحظتوا الفرق بين المثلثين ؟ 

الأول كان مكسر ومو مستقيمة أضلاعه ، أما الثاني كان في ضلعين مستقيمين تمام !!

وكمان الأول لمن كنت أرسم النقاط ، مكان ما أحط النقطة تكون ، خصوصا الزاوية اليمنى لكن في المثلث المستقيم الثاني لأ أنا حطيت الفارة في مكان و النقطة جات في مكان مختلف !!

شايفين هنا المكان الي كبست عليه صارت فيه النقطة .

لكن هنا لأ !!

في المثلث الأول الأضلاع مو مستقيمة :

في المثلث الثاني الأضلاع مستقيمة :

ياترى أيش الي سويته حتى صارت هالأستقامة ؟؟ 

الجواب : زر Shift !!!

ضغط زر Shift *من الكيبورد وقت الرسم يحافظ على أستقامة المسار مابين النقطة المرسومة سابقاً و النقطة الي راح ترسمها للتوضيح :

وحسب المساحة الي تتركها له يقوم برسم الشكل المطلوب ، يعني لو تلاحظون في منطقة أنا ضيقتها عليه ومايقدر يرسم خط مستقيم عندها ، قام رسم خط للأسفل لأنه أقرب خط مستقيم بين النقطة المرسومة سابقا ومكان النقطة الي أبغى أرسمها .

* أضغط Shift ولا تشيل يدك منو .

انتهينا تقريباً من الدرس باقي الواجب  وهو ظروري ومهم للي يبغى يكمل معانا لآخر السلسلة .

راح نرسم قلب لكن بالمستقيمات ونستعين بالشبكة - مش لازم نستخدم Shift - و الصورة في الأسفل حتى تسهل عليكم الرسم إن شاء الله .

* تم تعديل القلب ببعض التعديلات ، الي رسموه يرجعوا يعيدوه

أحب أشكر الأخ عبدالرحمن 90 ألي لولا الله ثم هو ماكنت سويت الدرس  ياهو دخل في خشمي وطفش أهلي  ” أحوبك ” فا يعني كل واحد يشكره و نصيحة أنا ماينفع معاي إلا كدا تنشب في حلقي أمشي معاك << معوق

في أنتظاركم الأسبوع القادم إن شاء الله راح أكمل إن كان هناك تطبيقات لأن وقتي صاير ضيييق والله يعين ويخارجنا ، دعواتكم .

جميع الحقوق محفوظة لـ Abdullah Saeed – www.asaeed.ws

[ الرجاء ذكر المصدر عند النقل ]

]]> http://www.asaeed.ws/blog/2009/%d8%a7%d9%84%d9%80-pen-tool-%d8%b5%d8%a7%d8%b1%d8%aa-%d8%a3%d8%b3%d9%87%d9%84-%d8%a7%d9%84%d9%85%d8%b3%d8%aa%d9%82%d9%8a%d9%85%d8%a7%d8%aa/feed/ 65 http://www.asaeed.ws/blog/2009/%d8%a7%d9%84%d9%80-pen-tool-%d8%b5%d8%a7%d8%b1%d8%aa-%d8%a3%d8%b3%d9%87%d9%84-%d8%a7%d9%84%d9%85%d8%aa%d8%ac%d9%87%d8%a7%d8%aa-vectors/ http://www.asaeed.ws/blog/2009/%d8%a7%d9%84%d9%80-pen-tool-%d8%b5%d8%a7%d8%b1%d8%aa-%d8%a3%d8%b3%d9%87%d9%84-%d8%a7%d9%84%d9%85%d8%aa%d8%ac%d9%87%d8%a7%d8%aa-vectors/#comments Wed, 01 Apr 2009 19:30:11 +0000 Abdullah Saeed http://www.asaeed.ws/blog/?p=385 السلام عليكم ورحمة الله وبركاته

الدرس الثاني : الـ Pen Tool صارت أسهل ! : الأوضاع

نبدأ ولله الحمد أول درس من سلسلة أو خلونا نقول مجموعة دروس الـ Pen Tool صارت أسهل !

سبب التسمية في الحقيقة أنو البن تول / Pen Tool أصلاً سهلة !! وبسيطة للغاية كل مافي الأمر وزيها زي أي شي في العالم تحتاج للمارسة !! الي راح نقدمه في هذه الدروس توضيح للتقنيات الي راح تساعدك في أستخدامك لهذه الأداة . ولا ترى فكرتها وطريقتها سهلة جدا وواضحة زي ما كان توصيل النقاط في هذه التدوينة ( من هنا ) قبل أن نخوض في شرح المتجهات / Vectors راح نوضح حاجة بسيطة ومهم كل شخص يكون فاهمها وعارفها 

|[ ماهي المتجهات ؟ ]|

عندنا في مجال الجرافيكس شكلين أو خلونا نقول نظامان للتصميم وراح نحتاج نتفلسف ونشرحهم بوضوح :

01 ] Bitmap Images أو الرسوم النقطية , وتسمى أيضا Raster Images , وتتكون من شبكة من المربعات الصغيرة Pixels ,وكل مربع يكون له مكان ثابت ودرجة لونية ثابتة كما أن العدد الإجمالى للمربعات يكون ثابتا ,ولذلك عند تغيير حجم العمل بالتكبير فإنه يفقد جزءا كبيرا من وضوحه ودقته , هذا النوع من الصور يظهر درجة مقبولة من تفاوت الألوان والظلال , و يندرج تحت هذا القسم الصور الفوتوغرافية والتصاميم المنتجة بالفوتوشوب أوبرامج التلوين الأخرى. الصيغ الي تدعم هذا النظام [ Jpg , Gif , Png , Bmp ... ]

02 ] Vector Graphics أو الرسومات المتجهة أو الشعاعية , وتتكون من خطوط ومنحنيات تعرف بطريقة الأشكال الحسابية وتسمى المتجهات Vectors, وتصف المتجهات الرسم وفقا لأرقام هندسية. ورسومات المتجهات يمكن إظهارها فى أى حجم بالتصغير أو التكبير دون أن يؤثر ذلك على جودتها ودرجة وضوحها , فعند التكبير ستتعدل الصيغة الرياضية ببساطة ويتم عرض الصورة بوضوح بنفس التناسب مع أبعاد الصورة الصلية , حيث تحتفظ بمنحنياتها وخطوطها الناعمة . الصيغ الي تدعم هذا النظام [ Eps , Svg , Ai , Pdf , cdr ]

طبعاً الكلام الي فوق مقتبس مع شوووية إضافات أنا ما أتفلسف بختصار زي كدا

زي محنا شايفين كمان أنو في النظام الأول الصورة لمن تكبرت صار في مربعات كدا مزعجة وتشوه الحرف هذه المربعات هي الـ Pixels

وفي النظام الثاني كبرنا ومازالت الحواف و الانحناءات زي ماهيا

طيب دحين راح نتعمق أكتر ونشرح أيش هيا المتجهات ..  !!!!  لحظة لحظة يا بشرية ! مو كأننا قد سمعنا هادي الكلمة من قبل ؟!

للي تزكر و الي ماتزكر راح نبين لكم شو هيا المتجهات :

أيووووووه بالزبببط هادي هيا المتجهات بختصار !! أي واحد وصل النقاط في تحدي توصيل النقاط ( من هنا ) يعتبر نفسو فاهم في أداة البن تول ويعتبر نفسوا كمان محترف فيها !!

حيجي واحد يقول لي : ياهووو عارفين أنو الهرجة متجهات ونقاط لكن مانعرف نسوي المنحنيات بفن وكدا !!!

صدقوني يا إخوة  الشغلة مرة بسيطة  أهم شي فهمنا انها نقاط وتوصلت !! زي كدا مثلا :

كل هذه صحيحة لكن حبة حبة شوية شوية تكون أفضل و أجود

|[ ماهي مزايا الرسم بالمتجهات ؟ ]|

1 – التحكم الكامل بالشكل المرسوم في أي وقت [ عدل زي ماتحب ] :

مع المتجهات أنسى أنو يجيك انهيار عصبي و أنت في منتصف عملك عشان تعديل بسيط في أحد أجزاء عملك الي ممكن ياخذ من وقتك وجهدك الكثير  ، التعديل مع المتجهات أو الفيكتور في أي وقت وبكل بساطة وسهولة !!

2 - التكبير و التصغير بكل مرونة مع الحفاظ على الدقة [ كبر وصغر إلى مالانهاية ] :

التكبير و التصغير لم يعد مشكلة !! نظام المتجهات يعطيك مرونة عالية في التكبير و التصغير مع الحفاظ على تفاصيل العمل 100% !

( دائما إذا أضطريت أحول شكل من Vector إلى Layer  أحتفط بنسخة من نفس الملف بنظام الـ Vector يمكن أحتاج أكبر الشكل أو اعدل في نص الشغل !! )

3 - حجم الملف المستخرج - النهائي - في نظام المتجهات / Vector أقل بكثير منه في نظام البكسلات / Bitmap [ خفيف زي الريشة ] :

أحد الأشياء الي نفتخر فيها في TooTStudio أن ملفات الفلاش خفيييفة جداً وهذا يرجع أن كل الصور و المحتوى داخل الفلاش مرسوم بأداة الـ Pen Tool - أداة الـ Pen Tool متوفرة في غالب برامج التصميم الثابت و المتحرك حتى الثلاثية الأبعاد –

نديكم كدا مثال سريع :

شايفين صورة الولد هذا ؟؟

حفظناها في المرة الأولى بصيغ نظام الـ Bitmap و اخترنا هنا صيغة jpg صار عندنا حجم الملف  : 46.2 كيلو بايت

المرة الثانية حفظناها بأحد الصيغ الي تدعم نظام الـ Vector كمشغل و محرر صيغة Swf - الملفات الفلاشية - والمفاجئة أن الحجم أنخسف من 46 كيلو بايت إلى 4 كيلو بايت تقريباً !! فعلاً خفيف زي الريشة  .

للتأكد هذه الملفات [ jpg - swf ]

|[ بعض برامج الرسم بالمتجهات ]|

برامج الرسم المتخصصة بالمتجهات قريبة من بعض بشكل كبير بالطبع كلها تعتمد على الـ Pen Tool بشكل كبير ، المصيبة مو هنا المصيبة أن أداة البن تول راح تلاحقك في غالب برامج الرسم فا مافي برنامج رسم سواء كان صغير أو كبير ثابت أم متحرك  إلا وتلاقي هذه الأداة فيه لإمكانياتها العالية و مرونتها 

تقريباً أبرز البرامج المتخصصة في هذه الأداة 3 :

1 - Corel DRAW

2- Adobe Illustrator

3- Free Hand

يهمنا الأول والثاني و المنافسة الحقيقية بينهما ، الأخير تبع شركة مكروميديا وبما أن شركة Adobe  أشترتها وعندها برنامجها المتخصص أهملت تطوير هذا البرنامج .

نستعرض هنا تجربة سريعة جدا للبرنامجين الأول والثاني - صورة متحركة أصبروا شوي - :

Corel DRAW

Adobe Illustrator

في فروقات واضحة بين البرنامجين في التعامل مع الأداة ولكل برنامج مميزاته 

مارح نتشعب في هذه النقطة لكن بعد ماتتقنوا التعامل مع الأداة على الفوتوشوب وعلى هذا ستكون الدورة جربو تتعاملو مع الأداة على برامج أخرى مارح تلاحظون فروقات كبيرة وهذا المميز في هذه الأداة 

|[ أعمال بالمتجهات ]|

بعد مانتعلم ونتقن الـ Pen Tool راح نكون قادرين على تصميم الشعارات و البطاقات و التلوين عن طريق الأداة و الرسم كذلك و الخط الحر و القص وكمان راح تساعدنا في تصاميم الفلاش و القائمة تطوووول بإمكانيات حبيبتنا البن تول

بكذا أنتهينا من التعريف وبإذن الله راح نبدأ في الدرس القادم نشرح أداة الـ Pen Tool ونعرف أوضاع الرسم و أدوات الرسم كذلك

[ مافي واجب اليوم أنبسطوا ]

الدرس الثاني : الـ Pen Tool صارت أسهل ! : الأوضاع

جميع الحقوق محفوظة لـ Abdullah Saeed – www.asaeed.ws

[ الرجاء ذكر المصدر عند النقل ]

Enjoy

أعتذر والله وبشششششششدة عن الإنقطاع بس أيش أسوي جلست في حرب مع جهازي أنتهت بـ ” فورماط ” على قولة واحد من الشباب

فا أعذرونا يعني أيش تبغوا أكتر من أنو ” فرمط ” الجهاز عشان خاطر عويناتكم <<  بكش بالدرزن

المهم بعد ما أخلص الكتابة هون ببدأ أجهز أول دروس السلسلة راح نتكلم عن أهم الأشياء الي لازم تعرفونها عن هذه الأداة السههههلة زي الموية

طبعا وبدون كبر وغرور الدروس مارح تكون زي أي دروس على المنتديات و المواقع العربية و الأجنبية إن شاء الله لأني ما أعتقد في أجنبي يحب الفلسفة و كلامه كثير زيي  .

حبيت هنا أعرف أقتراحاتكم و الأشياء الي تحبوا تعرفوها أكثر عن هالأداة بالتحديد ، راح أشرح لكم أشياء فكرتوا فيها و أشياء مافكرتوا فيها لأنو زي ماقلت الدورة هذه [ غيييييير ] زي حبيبتي جدة يعني

إلا أقلكم أيش رائكيم نسميها ( الـ Pen Tool  صارت أسهل ولا الـ Pen Tool أسهل ! ) ؟

[ بدأنا : الـ Pen Tool صارت أسهل ! : المتجهات / Vectors ]

أفسح المجال لكم .. تحياتي

]]> http://www.asaeed.ws/blog/2009/%d8%b3%d9%84%d8%b3%d9%84%d8%a9-%d8%a7%d9%84%d9%80-pen-tool-%d8%b5%d8%a7%d8%b1%d8%aa-%d8%a3%d8%b3%d9%87%d9%84-%d8%a3%d9%82%d8%aa%d8%b1%d8%a7%d8%ad%d8%a7%d8%aa%d9%83%d9%85/feed/ 13