كيفكم يا حووولللووويين على وزن هوولووين بما انكم شلة موررعبييين هههههه معليش لازم شوية هبالة عشان أمرن الكيبورد 

الموهييم بحمدلله قررت أأجل الكلية كمان سمستر وشكلو كدا حتتأجل لبداية السنة الجاية إن شاء الله لأسباب كثيرة من بينها أني بصراحة خايف على درجاتي!

على عكس ماكنت في الثانوي من يوم مابدأت الكلية وأنا مهتم بشدة بأدائي ودرجاتي والحمدلله نسبتي كانت عالية مقارنة بفصلنا وبقية الفصول كمان يعني زي ماتقولون أنا “مصطفى” حق ماليزيا هههههه

المهم السمستر الجاي في ضغط شديد في المواد خصوصا عليا أنا لأني حكون جاي ولازم أخذ مواد جديدة إضافية ما أخذوها دفعتي الي كملوا بشكل طبيعي فا قلت يا ولد أستغل الوقت وتمرن من دحين على الواجبات الي حتاخذوها وبيني وبينكم أنا بديت فيها قبل كم أسبوع قبل ما أقرر أني حوقف على أساس قلت لو جيت متأخر أكون على الأقل سويت كم واجب وبالتالي ما أخسر درجاتي.

طبعا هرجة الدرجات ما أدري ليش يمكن عشاني دافع لدي الدراسة وبالتالي حاسس بقيمة الفلوس وما أبغى أفرط فيها << أبو حضرم في أوج طاقته .

أو يمكن عشان دا مجال أحبه وأنا رجال يعشق التحدي فا ما أبغى أنهزم في المجال الي أنا اخترته وحبيته!! المهم أني من جد شاد حيلي يختي عليا أجنن! 

عموما دا مشروع flip book  الي هو دفتر وترسم عليه وبعدين تقلب الأوراق عشان تتحرك الصورة .. تعبت مرة عشان ألاقي لي دفتر مناسب رحت جرير وكل المكتبات مالقيت دفتر صغير مو مسطر أقدر أشتغل عليه أو فيه ورق يكفي لأنو كلها صغيرة أو لونها مو أبيض أو مسطر أو بس 50 ورقة!

فا أبويا راح مطبعة وزبط لي كم دفتر الحمدلله وشكرا لبابي << برضو يختي عليا أجنن 

طبعا هرجة المشروع دا أنو عندنا مادة اسمها 2d Animation الي هي تدور حول مفاهيم التحريك بشكل مبسط والـ flip book مجرد واجب أول أسبوع زي ماتقولون إحماء مو مطلوب فيه أي اهتمام بالرسم والأبعاد وو مجرد سوي شي يتحرك حتى لو بدون قصة عشان كدا أنا ما أهتميت كثير فيه خصوصا انو وقتي كان ضيق جدا لأني كنت أبغى ألحق أخلصه وأنفذ واحد تاني (المفروض نسوي اتنين كل واحد مو أقل من 100 ورقة مرسومة خلال أسبوع ) طبعا المشكلة أنو في الأسبوع دا عندنا 5 مواد تانية (أنا حتكون تقريبا 7) يعني تخيل أنو المفروض تسوي اتنين في يوم واحد تقريبا! عموما أنا على وشك أخلص التاني وبعدين برجع أزبط الي خلصته عشان في فريمات من جد مشوهه بسبب العجلة وبعدين أرجع أرسمهم كلهم بقلم الحبر الأسود (حاسس بالمشوار الطويل ؟ )

المهم دي المادة راح ناخذ فيها مبادئ التحريك مشاريع بسيطة مثل هذا قروب من كلاسي الي فات سووه

دا المشروع أعطوهم وقت مناسب وقسموا الشغل بين مجموعة طلاب أظن هو المشروع التاني بعد الـ flipbook

ومشروع مثل الكرة النطاطة أو كرة مع ذيل وو عبارة عن مشاريع تشرح مبادئ التحريك الـ 12 أنا قد بديت في كل دا زمان لكن على برنامج Maya فا ححتاج وقت اتمرن ازبطها على الورق وبشكل ممتاز فا حركز الأشهر الجاية اتمرن على دي المادة مع المواد الأخرى.

عندنا كمان مادة 3D Maya Essentials الي هي تتكلم عن مبادئ برنامج Maya وعمليات النمذجة ومشروعها الأخير تسوي دبابة حاليا أنا بديت أراجعها وأتعلم من أول وجديد عن طريق سلسلة دروس رائعة جدا من هنا تقدروا تحملوها “بالإنجليزي” Maya Essential Training - click here

حاليا خلصت دروس النمذجة في دي السلسلة بسوي تطبيق سريع وبعدين برجع أكمل الـ flipbook الأخير عشان أرجع تاني أطبق واجب أول أسبوع لمادة الـ Maya إن شاء الله.

عندنا كمان مادة Drawing For Animation دي أصعب مادة في دا السمستر الشباب مرة يشتكوا منها الظاهر لأنو مدرسها مرة مُتعب كمان، درسني مادة المنظور رجال عبقري وفاهم مرة بس شرحه مش تمام تحتاج تسأله كل شوية طبعا وقتها أنا الي كنت أضحي وأطفش أهله عشان يوضح كل شي هههههه عموما المادة دي لها مشروعين نسوي concept شخصية روبوت وطبعا الموضوع فيه تفصيل شديد كيف حيتحركوا  أيش مكوناتهم وترسمهم بأكثر من زاوية وبالمنظور وترسم لهم مشاهد والأسلحة حقهم كيف حتصير ووو .. فا أنا مخصص وقت كبير لدي المادة كمان.

في مواد حتكلم فيها لاحقا وحتكلم بالتفصيل عن كل مادة في وقتها بإذن الله دحين بس أبغى أكتب أي هرجة عشان ما أسحب على الموضوع والفكرة في أني أتواصل بشكل أكبر في المدونة 

المرة الجاية حجيكم بتطبيق أول أسبوع على برنامج Maya إن شاء الله 

قبل ايام عزمت أمري على تعلم النمذجة (تصميم الأشكال الثلاثية) على برنامج المايا الذي أتقن بشكل ما عمليات تحريك الشخصيات فيه ليس إلا، لكني لم أخض يوما تجربة النمذجة عليه. وبشكل غير متوقع تحمست بعض الفتيات معي على تويتر لتجربة البرنامج وتحمست أنا أكثر لرفع البرنامج نفسه مع سلسلة دروس عربية حملتها منذ سنتين تقريبا.

سبب اختياري لنسخة 2009 فقط لأني أجدها أقرب للدروس التي بين يدي و تيسر الحصول عليها كنسخة كاملة أكثر من النسخ الجديدة.

برنامج المايا يعتبر أبرز برامج صناعة الرسوم المتحركة ومعتمد في كثير من الأستديوهات العالمية لهذه الصناعة، وهذا هو السبب لإختياره دون غيره رغم صعوبة عمليات النمذجة والتصيير عليه كما أظن، لكن وبتجربتي معه في التحريك وتجربتي السابقة مع السينما فور دي في التحريك والأنيميشن وجدت سلاسة مذهلة مع المايا وتحكم كامل دقيق، قد تبدو على شاشة البرنامج التعقيد الشديد ورهبة عظيمة في النفس لكني أعتقد أنك بمجرد محاولتك الجادة والممارسة المستمرة ستعتاد على كل هذه الأزرار والأدوات بسهولة.

رفعت ملفات البرنامج مع اسطوانة الدروس العربية للمبتدئين على موقع الميديا فاير وهذا الرابط لمن يحب

- اضغط على الصورة-

البرنامج مرفق مع الكراك وشرح تركيب الكراك بالعربي والإنجليزي ولنسخ ويندوز 64 و 32 أيضا ^^

* بعد فك الضغط ستحصل على ملف iso تحتاج إلى برنامج winrar لتشغيله ومن ثم تشغيل ملف autorun وسيبدأ التركيب بإذن الله

Enjoy 

Abdullah Saeed

من زمان عن هالمدونة الطيبة، وشكلي حرجع لها مع فسحة هالوقت خلال هالشهرين القادمين إن شاء الله.

لكن حديثي اليوم هو رسالة للأصدقاء في المواقع الإجتماعية، سواء تويتر أو غيره مستقبلا.

تويتر في حالتنا اليوم، بالنسبة لي هو مجتمع حي بكل تفاصيله، الشيء البديع هنا أنك قادر على الإتصال بكافة أطياف هذا المجتمع خلف الشاشة، التأمل في أفكارهم و رؤاهم .. تتعرف على عقولهم وحسب فلا جسد يهم هناك!

بالطبع هناك الطيب و هناك الخبيث، هناك الفطن و السخيف .. وهذا متوقع لأني كما قلت في النهاية هو إنعكاس للمجتمع الذي نعيش! وقضية الإنعكاس تختلف بشكل فردي من شخص لآخر هناك من سيشوه صورته لتبدو أجمل أو حتى أسوء وهناك من يظهر جانب ويترك آخر وهكذا يسير الأمر.

بالنسبة لي صفحتي هذه Abdullah Saeed هي إنعكاس كامل لما أنا عليه .. أو هكذا أظن!

أنا لم أنشئ الصفحة لعبدالله الرسام، أو لعبدالله المصمم، أو لعبدالله المضحك كثير المزاح أو لعبدالله المتفكر أو لعبدالله الثرثار .. إلخ هذه الصفحة هي ما أنا عليه! وإلا كان بإستطاعتي ذكر ذلك في عنوانها غير وضع اسمي!!

إن كنت قد أضفتني لأني أجيد الرسم -في ظنك- فأنا الآن لم أرسم منذ 6 أشهر تقريبا!

إن كنت قد أضفتني لأني مصمم فهذه المدونة كما تراها الآن “قفر” منذ سنة تقريبا!

إن كنت قد أضفتني لأني أكتب بعض الكلمات المنمقة -من وجهة نظرك- فأنا كما تراني أيضا كثير المزاح والضحك!

إن كنت قد أضفتني لأني فكاهي ساخر فقد لاحظت لاشك جوانبي الأخرى وأني ثقيل دم أيضا! ..

إن كنت قد أضفتني لأنك تظن أني سأصبح مُحرك رسوم متحركة فقد يتغير كل شيء!

وهكذا لن ننتهي! لسبب بسيط أنت تابعتني لقالب معين تراني فيه، وأنا لست ذاك! هذه كلها إنعكاسات لذاتي مهارات و أشكال لحظية للتعبير عن عبدالله سعيد. ولم تكن أو حتى ستكون هو!

تأكد أنك إن تابعتني فقط وفقط لأجل تلك القوالب فسينتهي بك الحال إلى إلغاء متابعتي! لأني لن أتغير لأجل أن أرضي أحد مهما كان! أنا لا أحسن أرتداء الأقنعة للأسف.

في حسابي ستجد التلقائية و العفوية فقط، أمزح مع هذا أو ذاك ثم أثرثر عن أفكاري المبعثرة حول جمال العقل أو الكون أو حتى حادث حصل معي بالأمس! فجأة ابدأ بالرسم وفجأة اتوقف لأبحث حول مسألة فقهية .. هذه حياتي، خليط معقد يتجدد لحظة بلحظة لأني أكره الملل والماء الراكد.

لذلك أنا لا أقوم بمتابعة أي شخص يتابعني مباشرة، لا لشيء فأنا لا أهتم لقضية استفيد منك وإلا فلا! تويتر لا يعني بالنسبة لي مجرد الفائدة هو حياة رائعة ثرية بوجودكم جميعا، لكن أنا لا أود متابعة شخص لا يرى إلا عبدالله القالب! لذلك اتمهل كثيرا في متابعة أي شخص حتى يتعرف على ما أنا عليه في الحقيقة و إن استمر وعلى اتصال فسأتابعه طبعا! أليست صداقة ؟ وعندما أتابعك لن أتابع قالبك أيضا، سأستمع لتردد روحك واتبعها حتى أصل هناك. عندها لن يهمني ما تتقن أو ماتتكلم عنه. لهذا تجد قائمة متابعتي متنوعة جدا بالقوالب كما تظنها وتراها أنت! :) في تويتر أنا صديق حقيقي لكم سأسأل عنكم إذا ما غبتم سأبحث عنكم و أطمئن على حالكم، سأضحك متى ماضحكتم سأبكي متى ما بكيتم وسأنصحكم متى ما ظننت أنكم اخطأتم بالحُسنى! .. أليست صداقة ؟

يزعجني جدا عندما يأتي شخص ويقول أنت مزعج! ولا أريد متابعتك! وهل أجبرتك أنا لتستمر ؟ أنا من باب أولى لن أقبل أن يستمر شخص لا يهتم إلا بالسطح!

لذا أرجوكم جميعا لا أكترث لعدد المتابعين. فكر مليا قبل متابعتي وبعد متابعتي و تلمس اللُب لا القشور ^^

ورسالة إلى الأصدقاء الذين حظوا بتذوق مرارة صحبتي بإزعاجي الدائم لهم .. أُحبكم و أنتم النخبة والأقرب للقلب.

أعلم والله أني قد اكون مزعج جدا معكم، أنا أحمق في التعبير عن مشاعري تجاهكم تحملوني أو حتى نبهوني إن زاد الأمر، سأتفهم واتوقف، وذلك لا يعني أني بت أكرهكم :)

رسالة أخرى للأخوات، أقسم أني لست ذئبا بشري يعوي في الليالي البيض! كوني قد أمزح معكم فقط هو جرعة من مزاحي مع أختي بشاير ( هكذا تحب اسمها ) التي هي في سنكم بالمناسبة وتتابعني أيضا على تويتر مع والدتي كذلك! و إن كان المزاح أيضا يزعجكم رسالة بسيطة وتنبيه وسأتوقف وهذا بالطبع لا يعني أنك “ثقيلة دم” أو “متحجرة” على العكس أنا احترم رغباتكم جدا واتمنى أن يبقى حبل الود متصلا بيننا. ما أنا إلا أخ لكم ^_^

You’ve got to follow me for what I am, for simply being me

Don’t follow me for what you intend and hope that I will be

هذه الصفحة قابلة للتجديد سأضعها في صندوق التعريف بي في تويتر وغيره، حتى يتضح كل شيء للجميع منذ البداية.

لمعرفة المزيد عني يمكنك زيارة صفحة من أنا .

يعلم الله شو مشتائلكون كتير كتير 

عموما المفروض أني أقوم أخلص واجب رسم على المنظور وقبله أروح أصرف مصروف الشهر الجاي بما أنو الدولار مزبط نفسه من امس لكن فجأة حبيت أجي أهرج معاكم شايفين قد أيش احوووبكوووم ههههه واحد مرة ما تغير هههه 

عموما آخر تدوينة كانت حول تسجيلي في الكلية وبصراحة كتبت بعدها تدوينات حول الكلية لكن ماكنت أكملها لسبب أو لآخر وبيني وبينكم من آخر تسجيل فيديو حبيت موضوع التدوينات المصورة تريحك في الكتابة وتعطيك مجال تثرثر زي مابدك لكن عموما خلوني اديكم موجز بسيط بما أني على مشارف نهاية آخر السنة الأولى ولله الحمد 

عندنا في الكلية 3 سمسترات يعني 3 فصول في خلال أول فصلين يجمعون كل التخصصات الأنيميشين و الملتميديا و الجرافيك والرسم. الفصل الأول والتاني عبارة عن الفن بشكل عام 

عموما خلوني اتكلم عن المواد الي بناخذها.

History of Art – تاريخ الفن :

واحدة من أجمل المواد الي ناخذها، أنا أحب التاريخ بشكل عام فا كيف لو كان حول الفن وفكر الإنسان ؟ دراسة تطور الفن مهمة جدا بصراحة بديت احتقر فن هالزمان ! الي يشوف روعة ودقة و اتقان الإغريق وفن عمارة الرومان يُصعق ببساطة ! 

ولمن تدخل في عصر النهضة وما أدراك ما عصر النهضة أو Renaissance هنا يبدأ مخك يحتار بأي وجه حق تسمي نفسك فنان ! هههههههه خذوا نظرة على واحد من أهم النظريات في عصر النهضة والي انبنت عليها لوحات كثيرة منها لوحة العشاء الأخير الشهيرة لدافنشي وغيرها.

The Golden Mean or The Golden Ratio

النظرية حسابية لو تحبوا تبحثوا عنها أكثر من هون ( ويكيبيديا )

ومع تخيلك انو لوحة زي لوحة العشاء الأخير طريقة رسمها صعبه لأنك حترسم على جدار وتصبغ عليه مادة ولازم ترسم بسرعة قبل ماتجف المادة و الي يزيد الطين بله انو دافنشي ماكان خبير بهالأسلوب فا كيف ولد اللذين حسبها وضبطها !! الموضوع دا يطول جدا بحاول افصل تدوينة مستقلة عن الي اخذناه في مادة تاريخ الفن خصوصا عصر النهضة بما انه مليء بالنظريات.

Computer Graphic :

مادة لطيفة وخفيفة بندرس فيها برامج التصميم زي Illustrator & Photoshop أول فصل بندرس أبوسوليتور Illustrator والحمدلله بما أنو عندي خلفية فيه فا ماشي حالي زي العسل المواضيع كلها بن تول وكدا.

هذه الفاينل بروجكتز :

- تصميم بوستر إعلاني لحقلة موسيقية بالبن تول بالكامل مشروع الفصل الأول أضغط هنا -

اخترت سامي يوسف هنا والتصميم حاولت اخليه هادئ شوي رسم الوجه تعبني ما استخدمت فيه اي فلاتر رسمته قطعة قطعة والمخطوطة ورى جاهزة.

- تصميم بوستر إعلاني لفيلم بالفوتوشوب وشرط الفيلم يكون من الخيال الشعبي أضغط هنا –

هنا المفروض اختار قصة من الخيال العربي الشعبي وبحكم انو قصصنا كلها ام دويس وام الصبيان وشلتها ههههه قلت اختار من ألف ليلة وليلة والمدرسة ماليزية كانت متحمسة مرة مع قصة سندباد لمن قلت لها بختار من ألف ليلة وليلة فا قلت ولا تزعلي نخليها سندباد ياستي هههههه هذا البوستر لقصة سندباد مع طائر الرُخ.

Finished Art or Mock up :

المادة دي لذيذة جدا لكن مصيبتها انها تاخذ وقت ، كل الي نسويه عبارة عن تصميم تغليف منتجات أو كتب البوب آب. مهمة جدا لتخصص Advertising لأنو لمن تصمم مثلا علبة عصير جديدة تحتاج تسوي منها نموذج عشان يشوفه العميل وكدا فا هذه وظيفة المادة دي و تحتاج دقة متناهية لأنك حتقيس حتى النصف ملم ولو غلطت في القياس راحت عليك ههههههههه و القص وما أدراك ما القص تقعد مثلا ساعتين تقيس مزبوووط تجي للقص يخبص ويعدم أبو أم الشغلة عليك ! تعلمنا تصميم كتب البوب آب Pop up Books المادة ممتعة وتزيد مهارتك ودقتك في كل شيء تقريبا تصير ملحوس تدقق في كل شيء هههههههه

English Communication & skills – مهارات الإتصال :

المادة دي في الفصل الأول مُدرستها لطيفة جدا محلية المادة بصراحة شخصية متفائلة جدا ومتعاونة وخبيرة وتفهم الي تقوله، المادة عبارة عن تطوير مهارات المحادثة و البحث يعني كان عندنا في الفصل الأول مشروع نلقي خطاب لمدة 5 دقائق و  بحث حول موضوع اجتماعي ومن ثم نلقيه كمجموعة لمدة 20 دقيقة، والحمدلله عدى الفصل الأول على خير تطورت فيه بشكل كبير والفصل الثاني تفوقت ولله الحمد صراحة حاجة صعبة تقدم برزنتيشين باللغة الإنجليزية وأنا لغتي مش قد كدا لكن روح التحدي دفعتني قدما للأمام والحمدلله مجموعتي أخذت المركز الأول في الفصل الثاني .. الفصل الثاني كان عبارة عن دراسة لأساليب الإعلان المطبوع الأٌسس والقواعد وكيفية كتابة الإعلان وأيش الأفكار الأساسية والي تبغى توصلها، مادة ممتعة جدا العمل النهائي فيها كان تسوي إعلان سياحي وبعدين تقدم برزنتيشين حوله ماتشرح أيش مميزات العرض لا تشرح الإعلان وليش اخترت الكلمات دي وعن ايش تعبر وتطابقها مع الأسلوب الي اخترته وهكذا .. كان الإعلان الي رسينا عليه في النهاية حول اليمن والحمدلله أخذت العلامة الكاملة في هذه المادة ومجموعتي زي ماقلت اخذت المركز الأول والإعلان الي سويناه أفضل إعلان قدم للمُدرس في هذا الفصل منذ 2008 الحمدلله ^^

الإعلان النهائي بالعربية من هنا و الإنجليزية من هنا

Drawing :

مادة كنت خايف منها بصراحة هي عبارة عن رسم Still Life يعني تفاحة، قدر، سكين، جرة .. إلخ يحطون لنا المواد و يركزوا الإضاءة ويالله أرسم !!

طبعا كل كلاس في اسلوب مختلف مثلا مرة حطوا لنا كاسات قزاز وقالوا ارسموها بدون تظليل بس الحدود وخلوها متداخلة وكدا فا يطلع شكلها جميل، مرات نرسم مجسمات زي مثلا مربع، مثلث، مثلث داخله دائرة والمفترض مننا نتخيل الحدود حقه ونرسمها يعني انتا ترسم الي تشوفه قدامك والي داخل الجسم والي في الجهة التانية كمان بدون ماتشوفها هههههههه النقاط المهمة في دي المادة هي الظل كيف ترسم الظل بشكل محترم وكيف تشكل الأبعاد الثلاثة وتتلمس المنظور البسيط في العمل، لأنو اخذنا مادة في الفصل الثالث  عن المنظور فقط، لكن في دي المادة بشكل مبسط. مادة جميلة جدا وتطورت فيها بشكل حلو، ودي صورة لأول رسمة في بداية الفصل ورسمة الاختبار في نهاية الفصل الأول

الفصل التاني في دي المادة نفس الفكرة لكن رسم بالألوان وراح ارفق لكم عمل والحمدلله في هذه المادة الفصل التاني تفوقت بجدارة واخذت أعلى درجة ^^

للي يحب يشوف لوحات أخرى يزور المعرض من هنا

و راح اكمل البقية في وقت لاحق عشان بس عشان التدوينة طولت  ^^

الباقي هو الحماس حتكلم عن مادة الديزاين و رسم الشخصيات إن شاء الله

في رعاية الله حبايبي و .. حبتين 

أشتقت لكم وحموت من شوقي .. إلخ إلخ << ههههههههه واحد مرة ماعنده وقت

هالمرة تدوينتنا غير حتكون فيديو بإذن الله في البداية خلوني أوضح لكم كم نقطة حول العمل

أنا سجلت الفيديوهات الأساسية في 25 / 10 السنة الي فاتت في اليوم الي المفترض أني أسجل فيه في الكلية و أختبر أختبار تحديد المستوى للإنجليزية.
سجلت المقاطع التانية الي فيها الشرح أمس بعد مماطلة عنيفة بيني وبين نفسي كنت أفكر ألغي هالمشروع نهائيا مرات احسه هبالة ومرات ماله داعي .. إلخ
لحد ما قبل أمس نفسي بدأت تستغل موضوع توقف هالفيديوهات على أساس أنو ” أنا ما أعرف أسوي شيء كامل ” ودي كانت عقدتي من زمان لكني حاربتها السنة الي فاتت وانتصرت والآن رجعت !
فا عشان أسكتها بس نشرت لكم هالعمل بغض النظر عن انو مجرد سواليف وقصص ممكن ما تهم الكثير لكن مايهمني في هذا العمل هو تجربة التسجيل فقط والي استفدت منها شخصيا.
حاولت أكون صريح جدا في مشاعري وقتها في أشياء خلتني أراجع نفسي بعدها لأيام و أيام ليش كنت ضعيف ليش صرت ضعيف أيش الأسباب و كيف أنتبه مستقبلاً الي حاصل في الفيديوهات توثيق.
جلست مع نفسي بعدها للمحاسبة والحمدلله الأمور على ما يرام الآن .

* حصلت بعض المشاكل في منتصف التسجيل صارت الصورة مشوشة نوعا ما أتمنى تعذروني على دا الخلل.
* أتمنى أتمنى أنكم تتفرجوه للنهاية وتعطوني بعدها ارأكم سواء على المدونة أو اليوتيوب أو بقية المواقع الإجتماعية.
* أستخدمت في التصوير كاميرتي المرحومة S3 و التصوير الجديد كاميرة سالم DMC-LS80
* في المونتاج موفي ميكر وسوني فيقاس والأخير كانت أول مرة اجربه
* كل الفيديوهات من تصويري.

للي يحب يتابع أعمالي في الكلية وجديدي هناك

شكرا للجميع !

السلام عليكم ورحمة الله وبركاته

شطحة

أرسل ليا الحبوب عبدالرحمن العثمان تتويتة على تويتر يبغى ترجمة صفحة ظريفة، المشكلة أنو زي منتو عارفين طبعا منتو هنا مو منتو الأكلة البخارية اللذيذة جدا جدا جدا .. إلى آخر اليوم ، والي افتقدها بشكل في ماليزيا ذكرتوني والله بروح اقول لأمي تسويها اليوم.

عدنا .. المهم أنجليزيتي لسى في ريعان شبابها ولسى أمس قبل مايطلب مني الترجمة غلطت في ترجمة كلمة سخيفة جدا وبسيطة لأبعد درجة هههههههه brother-in-law صارت بقدرة قادر ” أخ” هههههههههه الظاهر أنه أثر التعب لأني كنت من الفجر إلى العشاء وانا اقرأ ولا كلمة زي دي المفروض ما أنساها << عاش مصرف

الشاهد أنو الصفحة مو مقال في الحقيقة أكثر من إنها استهباااااااااااااال ولحسن الحظ من الجنون و الهبالة الي أعشقها وبما أنها استهبال من الجميل انها تكون بالعامية

المقال يتكلم بشكل عام كيف تطلع فكرة تصميم لكن نقدر نطبق الخطوات على كل شيء.

عموما المقال مسطول وللحظات حتحس انك تضيع وقتك لكن مين يدري جرب سوي الخطوات ههههه !

* بترجم بأسلوبي لكن الفكرة بشكل عام لكل خطوة هي الأساس.

* في كلمات غيرتها لأسباب أخلاقية الي عندهم عادي مو عندنا

الي بين (  ) و * كلامي.

77 طريقة للحصول على فكرة !

1- كبر و صغر الموضوع في دماغك.

2- خذ الموضوع / المنتج بمنظور أو زاوية الطير و زاوية النملة !

3- تأمل الموضوع / المنتج كما لو كنت شيخ أو رائد فضاء أو مصاص دماء أو داشر

4- تفحص أو فكر بالموضوع / المنتج و أنتا لابس نظارات وردية !

5- إنسدح على الأرض !

6- أمسك نَفَسك لمدة 60 ثانية.

7- تخيل اسم الشركة داخل السجن أو خلف القضبان ( مافهمت إيش قصده بالضبط )

8- أكتب اسم الشركة بأسلوب الرسائل النصية ( الأختصارات ).

9- تكرفس في كرسيك ( صورة توضيحية )

10- تنفس بسرعة.

11- حط اسم الشركة تحت الموية.

12- تخيل موضوعك / منتجك مشعلل نار !

13- تقمص شخصية Luke Skywalker ( شخصية في فيلم Star Wars )

14- اكتب اسمك على خبزه / كعكة ( صورة توضيحية )

15- اكتب 12 شيء تتذكره لما تقرأ اسم الشركة.

16- ارسم لمدة 60 ثانية بشكل متواصل بدون ماترفع القلم من الورقة.

17- جرب ما ترمش لـ 60 ثانية.

18- تخيل انو ماعندك رموش.

19- ركز في الأرض لـ 60 ثانية.

20- احضن نفسك

21- تكلم زي الأطفال

22- حط شيء في فمك و قول اسم الشركة.

23- اشرب كاستين موية في جغمة وحدة أو متواصلة.

24- أكتب اسم الشركة على قماش وبلله بالموية.

25- أجلس 20 دقيقة تحاول تجيب 20 فكرة جديدة على ورقة.

26- شغل الموسيقى وعليهاااا ( هههههه في إذاعة راديو كذا شعارها صح ؟ )

27- تروش / استحمى( خصوصا إذا ريحتك مخيسه أفهمها يعني )

28- سوي ضغط 10 مرات أو أقل.

29- أصرخ ” أنا جيعاااان “

30- تخيل انك Neil French ( مصور و مصمم بريطاني شهير ).

* فكروا بمصمم عربي مشهور كيف كان حيفكر لو جاه نفس شغلك.

31- مثّل زي Marilyn Monroe ( ممثلة أمريكية من عام حفر البحر قديمة يعني ).

32- أفتح القاموس على صفحة بشكل عشوائي و اقرأ. ( مفيدة جدا والله خصوصا لو إنجليزي إنجليزي )

33- أحصل على حيوان آليف ( أكيد بسه مايبغالها كلام  )

34- صور نفسك.

35- حط سدادات أذن في أذنك.

36- برّي أقلام الرصاص ( أجعلها حاده )

37- أخلع حذائك.

38- أنظر إلى السماء لـ 60 ثانية.

39- أمسك خشمك و تكلم ( الصوت الي يطلع كأنك مزكم  )

40- أخلع الشراب و أمشي حافي القدمين.

41- تخيل موضوعك / منتجك مجمدا و إذا ما كنت تستطيع إمساكه.

42- عد فلوسك الي في المحفظة. ( )

43- أحلم.

44- ألعب مع الأطفال أو حيوانك الأليف أو بالألعاب. ( عن تجربة تجيب مفعول )

45- كل حلويات ( تصريفة حلوه للي قاعد يسوي رجيم  )

46- تصفح النت من خلال موقع StumbleUpon.com

47- سوي نفسك خكري أو عربجي إذا أنت خكري

48- رتب مكتبك.

49- استنشق بعض الزهور أو أوراق الشاي.

50- بلل شعرك.

51- نظف أسنانك بخيط الأسنان.

52- أقرص نفسك.

53- حط شيء فوق راسك أو على جسدك ( احس فوق الراس أكثر إلهاما )

54- أخلع التيشيرت.

55- تظاهر أنك تلعب قولف. ( تحرك كأنك فعلا تلعب )

56- تظاهر أنط تلعب كرة سلة.

57- قبّل شعارا ما.

* النص أصلا يقول قبل رمز الحظ أو شيء من هالقبيل.

58- اصنع فقاقيع الصابون أو العلكة.

59- سوي مقلب بالتلفون ( مزحة )

60- استعير شي غالي بدون ما تستأذن ( حتتلطش لو سويتها فيني  )

61- ارسم وجه في اصباعك.

62- ألبس شيء غريب.

63- تأمل في الغيوم وتخيل لو كان فيها رسالة أو أشكال.

64- عد الأرقام بالمقلوب من 27.

65- أرفع رجليك لـ 60 ثانية.

66- تظاهر أنك تعزف على القيتار أو البيانو.

67- حط شوكولا في فمك و لا تاكلها ( قاوم الإغراء )

68- هز راسك.

69- أجلس زي النينجا ( كأنك تقرأ تعاويذ ودي الخرابيط )

70- أفتح النافذة و حدق في شيء واحد لـ 30 ثانية.

71- أصنع طائرة ورقية.

72- فكر في موضوعك / منتجك كما لو كان مقدم للناس الغنية جدا.

73- أكتب حروف عشوائية واقراها كما لو كانت شفرة سرية.

74- حاول تطلع 5 أفكار غبية.

75- فكر في سيارة مطابقة للمنتج أو الخدمات من ناحية اللون أو الصفات.

76- أرسم عميلك بأسلوب Dilbert ( الموقع )

* كوميك أمريكي ساخر حول الشركات.

77- قفل عينك و أسترخي.

انتهى.

* المقال الأصلي

طبعا زي منتو شايفيني و المنتو هنا مو الأكلة البخارية … إلخ هههههه

المهم زي ما تشوفوا كلها أشياء مجنون وعبيطة وعن تجربة هذه هي الأشياء الي تطّلع الأفكار، الأفكار الرائعة والغريبة بشكل عام ماتجيك لمن تسوي عصف ذهني وكدا غالبا و انت تسوي شيء ماله علاقة ابدا بالشيء الي تبغى له الفكرة عن نفسي المشي يساعدني مرة لمن أمشي أسرح و أمرح وتبدأ الأفكار تهل من كل مكان ^_^

بالتوفيق للجميع و آآسف لو اخطأت في ترجمة شيء أكيد حيكون في أخطاء في النهاية هذا عمل انسان و لسى مبتدأ.

دعواتكم تتيسر أموري و ابدأ دراستي بإذن الله ^_^

كيف حالكم أحبتي

عموما كل عام و انتم بخير و عساكم من عواده

حبيت أطرح تصويت و أستفسار مهم جدا بالنسبة لي ، خصوصا أني أخطط لطرح سلسلة دروس قادمة إن شاء الله طبعا مش بكرة ولا بعد أسبوع حطبخها صح هالمرة إن شاء الله و أنفذها كلها ثم أنزلها إن شاء الله .

أستفتاء

في البداية أبا أخذ رأيكم في سلسلة البن تول صارت أسهل

n

كمان اتمنى تعطوني أقتراحاتكم و رأيكم من خلال التعليقات أيش الي ماعجبكم و أيش الي تقترحونه زيادة ؟

كل ما ساعدوتني أكثر و اديتوني رأيكم بصراحة كل ما قدرت أوصل لمستوى أفضل في طرح الدروس .. لأجلكم
* الي ما قد شاف الدروس يطلع عليها ويديني رأيه بعد تفحص طويل إذا سمح .

أستفسار

لو كنت مبتدئ في الفوتوشوب أو لسى حتخش التصميم ..

أو لو كنت مصمم ويزعجك تشوف مصممين زي الرز في الساحة لكن بدون ما يفهموا المعنى الحقيقي للتصميم ..

لو كنت تعرف أحد يبغى يتعلم تصميم ..

أتمنى تعطيني أفكارك أو أيش الي تبغى تعرفه كبداية حول مجال التصميم بشكل عام و حول الفوتوشوب بشكل خاص !

* لا أقصد هنا أيش الدروس الي تبغاها .. لطلبات الدروس من هنا الي أقصده أستفسارات حول المجال و البرنامج بشكل عام.

تقريباً هذا الي أبغاه حاليا منكم و أتمنى والله تتفاعلون معايا شوية عشان أقدر أنفذ الدروس الجاية بحترافية إن شاء الله

محبكم دوماً و أبداً

عبدالله .. والأقر على الله

[ كل عام و أنتم بخير يا أحبابي ]

راح أحاول بإذن الله أدون لكم مالجديد و الغريب في رمضان ماليزيا اليوم في التراويح كان في شوية أشياء غريبة علي وممتعة راح أحكيها لكم في التدوينة القادمة بإذن الله

أتمنى لكم رمضان حافل بالطاعات ^_^

[ مصدر الصورة ]

محبكم

عبدالله و الأقر على الله << من زمان ما قلتها

في البداية أشكر كل الزوار والله ثم والله لكم معزة خاصة فردا فردا و بجد أتكلم

أعتذر عن عدم الرد لكل التعليقات في التدوينة السابقة لأن النت ماكان متوفر وقتها في الشقة .

بصراحة ما أدري من وين أبدأ ؟!!

كل الي سمعته عن ماليزيا مختلف تماماً عما وجدته هنا !

قبل ما أتكلم عن ماليزيا أحب أنوه أني شخص ما يشغل باله بالسلبيات ورؤيتي دوماً إيجابية و واقعية لمن أحب أتكلم عن شيء معين ولله الحمد , بالتالي ممكن كلامي يختلف عن نظرة كثير من الطلاب هنا .

أول ماجيت ماليزيا كنت في قمة اللامبالة !! لدرجة أنو قريبي قلي شكلك مو شكل واحد مسافر كأنك ما تحركت من حارتكم !

وهذا الشيء الي فعلاً كنت مستغرب منه !! ياااااااهوووو صح صح معايا درقم درقم << صوت النقر على راسي

عموما للأسف شعوري حول أني جيت بلد جديد وكدا ابدا ماحسيت فيه ، أوكي صح أنو في أشياء جديدة بس عادي مافي حماس !

كان أول أسبوعين في ماليزيا قمة الملل !!!! يا ترى لييييييش ؟

أولاً : أنا كنت ومازلت جدي جدا من ناحية الهدف من جيتي لماليزيا وكنت متحمس للدراسة أكثر من جيتي أصلاً !

ثانياً : صارت لخبطة في فهم عملية ” الفيزا ” وكيفية الحصول عليها من المعهد مما أخر عملية التسجيل  ( من ربشتي  ) .

فا بالعربي قعدت أسبوعين في البيت بدون لا شغلة ولا مشغلة ! و أنا لو تبغى تقتلني عيشني في روتين بدون هدف .

المهم بعدها قابلت حبيب قلبي ” منزرايا .. أنتا معاه ولا معايا ” و أختصارا ” منذر ” والي أعتقد أنه زعلان عليا بعد حركة في قمة الشيانة سويتها فيه بدون قصد

السكن في ماليزيا – كما شاهدت – هو غالبا على شكل مجمعات سكنية ( Condominium )

يعني مثلاً 6 عمائر كل عمارة 18 دور وكل دور فيه أكثر من 10 شقق ! هذا مثال من مجمعنا المفقع فكيف المجمعات الراقية ؟!

عموما منزر ساكن في مجمع قديم لكنه مرتب أكثر بكثير من مجمعنا ، يعني عندهم مسبح و ممشى و حديقة صعنونة و الأهم عندهم بقالات عربية ! أصلا المجمع تقريبا كله عرب عراقيين على ليبيين هدولا العوائل والبقية سودانيين على يمنيين طلاب فا المنطقة حبوبة شوية .

أما أحنا مجمعنا معدوم شويتن وهنا تكمن روعته !!

أنا أموت في المناطق الشعبية يعني بالنسبة لي الكندرة ولا الأندلس و المنفوحة ولا العليا !! مدري ليش !!

غير أنو منطقتنا “Sunway” حية بشكل رهيب يعني مثلاً احنا زي ماقلت مجمع مضروب الشارع الي قدامنا

مجمع “South Quay” فخم هو مجمع فلل مطلة على بحيرة وجمبهم ملعب غولف !!

فندق sunway

منتجع Sunway Lagoon المائي

سوق Sunway Pyramid

غير كدا الحي بشكل عام مرتب مرة مستشفى كبير جدا سوق كبير “Sunway Pyramid” على شكل أهرامات مصر حاجة تحفة صراحة .

حسيت أني قاعد أسوي إعلانات ههههههه .. عموما المنطقة جدا رائعة و أرتحت لها كثيرا و الحمدلله غير أنو الكلية الي حخشها إن شاء الله في نفس المنطقة جمب السوق دايركت .

وهذا الي خلاني كل ما أدور على شقة خارج المنطقة ما ارتاح لها و أشكر حبيب قلبي منذر تعبته معاي في البحث ، لدرجة أني كنت فعلا مهموم جدا بمسألة الغرفة .

نرجع لمنزرايا لمن كنت عنده سوى لنا غدوه معتبرة ماشاء الله بالنكهة السودانية .. تسلم يدك مونزير .

في النهاية لقيت لي سكن في نفس المنطقة “Sunway” ونفس المجمع الي فيه قريبي بس العمارة مختلفة أو الـ Block مختلف

sunway منطقة رائعة جدا ويملكها على ما أظن رجل أعمال صيني ، تقدروا تبحثون أكثر عنها من خلال موقعهم أو من الصور في قوقل وغيره .

نجي دحين للشعب نفسه !

ماليزيا عبارة عن خليط بين الماليزيين الأصل و الصينيين و الهنود و كلهم عندهم الجنسية الماليزية لكن طبعا تقدر تفرق بينهم دغري

منطقتي يكثر فيها الصينين بشكل ملحوظ و الصينين بشكل عام هم تجار البلد و الي خربوا أخلاق البلد البنات هنا شكلوا اللبس القصير عندهم عبادة !!

عموما الشعب حاله حال نفسه لكن الهنود في منهم المجرمين و الصينيين يلهفون فلوسك لو كنت “أهبل” لكن الماليزيين نفسهم أنا أختلطت بيهم في المسجد و المعهد مرة حبوبين

على طاري جماعة المسجد في ولد صغير دوبة يشبه الولد الصغير في فيلم UP  كأنهم ماخذين الشخصية منه هههههه نفسي أصوره بس أخاف أبوه يزعل .

و العرب السياح هنا كثر كل يوم لازم تشوف لك عائلة ، حتى مرة ولد صغير ماصدق شاف طخة عربية قام نقز علي وقال : السلام عليكم

في العاصمة كوالالمبور للأسف الإسلام شبه مخفي يعني عاااااادي جدا عند الماليزيين نفسهم هرجة الـ Boy Friend و الـ Girl Friend وحددت الماليزيين كونهم المسلمين أما الصينيين و الهنود ماعندهم مشكلة يخربوها .

فا عادي تشوف محجبات و أحضان وقُبل مع أصحابهم !! و أعتقد أن السبب في ذلك هو دخول الصينيين و الهنود وتأثيرهم على المسلمين ” في العاصمة ” أما في الضواحي الأمر مختلف جدا الإسلام أقوى .

الجميل أن المصليات في كل مكان لا يمكن يكون في سوق أو مجمع بدون مصلى و وقت الصلاة في الأسواق مثلا المصلى يكون عامر بالمصلين ماشاء الله .

لكن بشكل عام الي يدور على مظاهر الإسلام في العاصمة حيتعب .

Mee Goreng

بالنسبة للأكل  الحمدلله أكلاتهم الشعبية روعة و أغلبها تعتمد على الرز المطبوخ بالخضار مثلا :

Nasi Goreng Ayam

Nasi goreng ayam : الي هو عبارة عن رز مطبوخ بالخضار مع دجاج مقلي . الي يبغى يذوقها يروح محلات راقية لأنو الشعبية الرز حقهم خرافي لكن الدجاج يابس كأنو من عام حفر البحر !

Mee goreng : أندومي مكشنة مع البيض و الدجاج في بعض الأحيان وفوقها بصل مجفف ، لذيذة جدا جدا .

Roti

Roti : الشباتي ، لذيذ جدا جدا مع الكاري وفي عندهم روتي تلور شباتي بالبيض مع الكاري حاجة تووووحفة .

هذه الاكلات بشكل عام و طبعا في أكلات بالهبل الأكل الجاوي أو الأندنوسي و الهندي كمان يعني هرجة أنو مافي أكل مرة ما تخش المخ !!

و أنا أصلا أعشق الاكل الهندي حتى النخاع فا عايش حياتي هنا  . طبعا غير أنو كل أنواع المطاعم العالمية موجودة !

كمان عندهم الشراب الماليزي الرسمي على قولة مهند

أنا ماقد عمري شفت ناس يعشقوا منتج معين بقدر عشق الشعب الماليزي لمنتجات ميلو !!

حليب ميلو ، آيس كريم ميلو ، حليب ميلو بارد ، كاكاو ميلو ، بسكوت ميلو .. إلخ . مافي منتج لميلو إلا عندهم !!

و أغلب المطاعم مثل ماكدونالدز تقدم الميلو في قائمتها وبالشكلين الحار و البارد !!

في البداية كنت مستغرب وبعد أن جربته وقعته في حبه من أول جُغمة هههههه خصوصا ميلو آيس بااااااارد شي يُقتل  !

ماهي يدي عشان ماتنبسطوا وتقولوا الدبه أهو الدبه أهو :p

بالنسبة للصرفيات في ماليزيا زي السعودية تقريبا ماتفرق كثير لكن في الأكل رخيصة ، تخيلوا أتغدى في البرجين بـ 10 ريال

هذه وجبة عادية و دسمة ” صحن ماكرونة إيطالية ” و ماكدونالدز مثلا الوجبة بـ 9 ريال وتوصل 6 ريال لوجبة برقر السمك !!

و أعتقد أن السبب في ذلك أنو الشعب هنا الأم و الأب يشتغلون فا يجتمعون عالغدا في هالمطاعم مع بزورتهم فا مدام في طلب كبير السعر حينقص طبيعيا

لكن في الأكسسوارات الإلكترونية شوف السلخ

سعر صرف الـ 100 ريال سعودي قرابة 84 رينقت ماليزي و أكبر عملة عندهم الـ 100 أنا لمن أسحبها أتورط فيها مافي أحد يصرفها غير المطاعم الكبيرة !

كمان تصميم فلوسهم مرة عجبني ، غير كدا عندهم حتى الهللات يعني الهللة تقدر تاخدها من ورى خشمهم مو زينا في بنده ولا غيرها ياخذوها عنوة و يصرفونا بعلكة .

المواصلات وما أدراك ما المواصلات !!

روعة كوالالمبور بالنسبة لواحد جاي من السعودية ، تكمن في المواصلات !!

في كوالالمبور المواصلات داخل المدينة متنوعة مابين التكاسي و الباصات ( الي تجي في موعدها بالملم مو زي باصاتنا الي تجي قبل موعدها .. هي تجي أصلا ؟  )

كمان في القطارات بأنواعها !! أيوه القطارات 3 خطوط ! تقريبا كل منطقة في العاصمة أقدر أروح لها بالقطارات أو كما يسمونها بأنواعها ( LRT – KTM – Monorail ) و أسعار المواصلات زهيدة جدا

و الأعجب أنو لو انتا مشاويرك كثيرة تقدر تاخذ بطاقة بـ 150 ريال وتركب في الباصات و الـ 3 قطارات بعدد لا محدود ! ولو أنت طالب خصموا لك نص السعر !!

كمان كون المواصلات تمشي بالثانية شيء يساعدك بقوة أنك تضبط يومك .

خلونا أحكيكم كيف يمر يومي العادي  ..

في البداية أقوم الساعة 5:40 الصباح قبل الفجر بـ 10 دقايق قبل الفجر ، وللأسف رغم أن المسجد في نفس المجمع ما أسمع الأذان !

عرفت قيمة الأذان هنا والله

نصلي الفجر وبعض الأحيان يلعب عليا الشيطان ويخليني أنام إلى 6:30 و أنا وياه في حرب و دعواتكم لي بالنصر .

بعد الفجر نجلس في قراءة من كتاب رياض الصالحين بعدين شوية دردشة مع الشباب و أطلع البيت أخذ لي دش

و أفطر لو كان لي مزاج وفطوري توست بالجبنة و عصير برتقال و كثير من الأحيان أنزل بدون فطور أفطر بس عشان أحزن على التوست يقطن !!

عاد التوست حقهم خرافي طري طراوة مو طبيعة نفسك تنام عليه خخخخ

المهم تجي 6:56 ألبس ملابسي و أخرج من الباب 7:00

طريق روحتي من البيت لحد محطة أنتظار الباصات.  1.7 كم

أوصل لراس الشارع 7:10 و أبدأ مشي لييييين موقف الباص كيلو و 700 متر مشي يعني تقريبا 20 دقيقة و أوصل على الساعة 7:30

أجلس أنتظر الباص رقم 76 عشان يوصلني لمحطة قطارات رئيسية وهي تقريبا أكبر محطة للقطارات ” KL Sentral ” الباص يوصل 7:35

أغراءات التكاسي في حال تأخرت عن موعد الباص الأول

بعض الأحيان أشتري موية و اتلكع في المشي فا أوصل 7:35 يكون الباص راح عليا فا أنتظر نفس الباص يجي 7:45 تقريبا أو أخذ باص تاني رقمه 63 يوصلني لمحطة رئيسية تانية ” Pasar Seni “

بس مشكلة الباص التاني أنه ياخذ وقت أطول في الوصول مع أن المحطة حقه بعد KL Sentral  بس لأنه يمر بطريق مختلف فا الزحمة تختلف وبالتالي ياخذ وقت أكثر !

80% من السيارات في الطرق صناعة ماليزية

المهم عادة أوصل لـ KL Sental الساعة 8:30 الوقت يكون بكير مرة يعني لو ركبت الـ LRT حوصل قبل مايفتح المعهد اصلا !

زينوا مجرى المياه برسومات على الجدران ، شوفوا الرسم على أصوله !

فا أقعد ألف لف شوية في المحطة و أركب القطار على 8:40 أوصل لمحطة KLCC و الي هي تحت البرجين على الساعة 9 تقريبا مش متأكد لأنو ممكن تفرق دقيقتين

مع أنو القطار يمشي بالثانية بس أنا متذبذب في دخول القطار من KL Sentral فا ممكن يكون في تنقص عن 9 دقيقة ولا دقيقتين .

المهم أمشي 500 متر تقريبا إلى المعهد يعني بالعربي المعهد يبعد عن البرجين 250 متر بس !!

عموما أمشي تقريبا عشر دقائق و أتأمل في الناس و العالم الماشية و النشيطة عالصباح والي يشتري فطور من البسطات في الطريق

ذكرتوني بتجربتي مع “الناسي لمك” فطور الماليزيين عبارة عن رز أبيض وصلصة حارة و سمك مجفف أنا ذقت السمك أنصرعت  قمت الله يكرم النعمة كبيت كل السمك و أكلته بدونه !

كنت أتمنى لو أخذت دجاج بدال السمك حيكون تحفة مع الصلصة ..

عموما وبكذا تقريبا أوصل للمعهد على 9:10 أجلس 20 دقيقة في الكلاس وبعدين يبدأ الأستاذ في التاسعة و النصف

بصراحة أستمتع جدا جدا في الدرس لأني في الحقيقة متعطش لتعلم الإنجليزية !

الجميل في الأمر أني كونت علاقة قوية بيني وبين المدرس و الطلاب نحدثكم عنها إن شاء الله في تدوينة لاحقة .

يدرسونا مدرسان أثنان واحد اسمو Simon و التاني Paul  كلهم من بريطانيا أصل و فصل الأول من ضاحية نسيت أسمها و التاني من مانشيستر. راح أفرد تدوينة تتكلم عن المدرسين الي قابلتهم و الي حقابلهم لاحقا إن شاء الله .

التدريس في British Council ممتع و مفيد أكثر مما توقعت ! نخلي الحديث عنه في وقت آخر إن شاء الله .

عموما أخلص الكلاس عالساعة 1 الظهر أصلي الظهر في المسجد الي ورى البرجين مسجد حلو و كبير ، مرة كنا جالسين أنا و منذر شوية نسمع إيقاعات و آهات  هههههههه بعدين رجال تكلم بالمالاوي يعني الإيقاعات زي الأنترو للإعلان عن شيء .

يمكن كان يقول أن الصلاة بعد قليل لأنو كان قبل وقت الأذان بشوي .

المهم بعض الأحيان بعد الصلاة أجلس في ( ELLZ ( English Language Learning Zone الي هي منطقة التعلم الذاتي أو Self Study هو عبارة عن كمبيوترات فيها برامج تعليم بالهبل و إنترنت و كمان أوراق أختبارات ذاتية لكل فصل تاخذه في المنهج .. الدراسة هناك ممتعة جدا ! <<  لا عاد تمتعون هالولد ههههههه

المهم أن وقت الرجعة مو منضبط لأنو حسب المزاج ، أنا دقيق في الروحة عشان ما أتأخر و يقول لي simon بكل استهبال Good Night Abdullah هههههههههه طبعا حسب وقت التأخير تكون الجملة ههههه

الحمدلله مرتين تأخرت و مرة غبت لأني قمت متأخر مررررررة و المصيبة داك اليوم نمت بدري مرررررررة لكن الحمدلله.

في الرجعة أروح لمحطة KLCC لآخر محطة الي هي محطة منطقتنا Kelana Jaya الطريق طويل جدا قرابة 40 دقيقة أو تقل مش متأكد لأنو كل طريق الرجعة من LRT إلى الـ Bus  أكون نايم فيهم ههههههههه

و يقال أني من قوة الرعب في وجهي لمن انام أتحول لميدوسا  عشان كدا أقوم ألاقينا مسوين حادث و الناس ميتين و متحجرين وفاتحين فمهم وعيونهم كأنهم شافوا حاجة مرعبة و سواق الباص يكون يناظرني و يأشر كأنه يقول ” يخرب بيتك ” طبعا وهو متحجر

المهم بعد ما أوصل Kelana Jaya أنتظر الباص والي ياخذ وقت طويييييل بين كل روحة و التانية يعني مثلا باص 76 يمشي كل 10 دقائق أما باص 23 و الي هو باص Kelana Jaya يمشي كل 30 دقيق تقريبا !!

عشان كدا ما أروح بيه الصباح .. المهم الباص دا ياخدني لييين تحت السوق حقنا Sunway Pyramid و نرجع للبيت بعد يوم طووووييييل وممتع ^_^

ترى في تكملة بس تعتب صراحة هههههههههه عموما أنام على الساعة 11 تقريبا بعد مذاكرة لذيذة .

في النهاية أتمنى أنكم تدعون لي بالتوفيق في مشواري الدراسي لسى ورانا كلية وزحمة و ربنا يعين

للي يحب يتواصل معاي زي ماقلت سابقا

Twitter + Tweitter Pic

سبحانك اللهم وبحمدك أ شهد أن لا إله إلا انت نستغفرك ونتوب إليك

أشتقت لكم يا معفنين << واحد مايعرف يشتاق ههههههه
طبعا اكتب هالتدوينة وانا ميت جوع بس كسلان انزل اخد لي ” ماقي قورينق ” ولا ” ناسي قورينق آيام ”

عموما بما أنو لحد الآن ماعندي نت في الشقة فا حيكون تواصلي متقطع جدا إلين مايفضى أحد لي ونروح نشوف هرجة النت إن شاء الله
للي مو عارف أيش الطبخة ، بعد سنتين كد سافرت ماليزيا للدراسة الجامعية ولله الحمد

خلوني أحكي لكم القصة من مطار الملك خالد في الرياض الي اكتشفت بعدين انه خرابة قدام مطار القاهرة و كوالالمبور !! من جد أنا ما أدري دوبهم يصحوا ويزبطوه ؟

بعد مناحلة أكد لي أبويا الحجز على الخطوط المصرية روحة ورجعة مفتوحة لمدة سنة ودا الي كان المطلوب والحمدلله

الرحلة كانت الأثنين 15 مارس وكان مكتوب الحضور الساعة 11 بالمطار ، الليلة الي تسبق الرحلة طبيعي ماعرفت أنام بالرغم من أني ماحسيت أني مسافر أبدا ولا حتى للخرج !!

المهم جت 11 بالضبط انا كنت واقف عند بوابة صالة شركات الطيران الأجنبي
رحت أخلص أوراقي و أدخل العفش شوية أكتشف أنو الرحلة الساعة 2 بعد الظهر !! و أنو الترانزيت للقاهرة مو 3 ساعات طلع 8 ساعات تقريبا !!

المهم جلست أنا و أهلي نقرقر وبما أني ما أكلت شي من 15 ساعة تقريبا أبوي نزل يشتري لي شي يتاكل قلك باخذ قطمة صغيرة وخلاص لأني ماكنت أبغى أكل قمت بلعت الساندويش كل أبوه هههههههه

دردشنا شوي وجاء وقت الرحلة سلمت على حبايبي وتعرفوا حنان الأم والأب الله يحفظهم ليا يارب

المهم دخلت الصالة لطعوا أمي ساعة كمان كما هي العادة

في الساعة دي ماخليت احد يمشي قدامي الا وحسبت مشيته كم فريم << لحسة أنيميتورية

والله واحد عذبني مشيته غريبة جدا يسرع ويبطئ بس طبعا مو أغرب من مشيتي ههههههه

المهم شوية دخلنا الطيارة وكانت الفاجعة !!
الطيارة صغيرة جدا الي قد ركب طيارات ” ناس ” زيها بالزبط !! أنا تحطمت لأني كنت حالف يمين ما أركب مع ناس مرة تانية بسبب الطيارة الي مقاسها شبرين المهم الي هون علي الهرجة أنو كنت نعسان مرة والرحلة كانت من الرياض إلى القاهرة 3 ساعات نقدر نتحملها
فا سحبتها نووووومة إلين ماوصلت الطيارة للقاهرة .

أكتشفت قد أيش أنا على نيتي ههههههه لمن دخلنا الطيارة دفني واحد بالغلط ودخلت على منطقة المضيفات فا شفت المضيفة كاشفة شعرها قلت مسكينة مالحقت تلبس الحجاب والناس دخلت الطيارة
شوية وأنا جالس ألا تجي وحدة تانية لابسة لحد الركبة وكاشفة طبعا قعدت أضحك على نفسي هههههه
زي ماقلت لكم نمت بعد كدا لحد ماوصلنا مطار القاهرة

[ القاهرة ]

دخلت مطار القاهرة و أنبهرت صراحة ومو غريبة على مصر بما أنها بلد سياحي

خلصت إجراءات الدخول لمصر عشان بروح للفندق الي وفرته لي الخطوط المصرية عشان الترانزيت ، طبعا وصلت كدا على المغرب فا ما لحقت أهجول في مصر و كمان ما أحب تمشيات الليل فا جلست في الفندق

ودونا فندق Fairmont قريب من المطار على طريق صلاح سالم

الفندق كان متروس خواجات كان معاي من المطار شلة بنات من نيويورك و بريطانيا وفي وحدة لكنتها غريبة

طبعا أنا أنحطيت في موقف محرج جدا لكن الحمدلله عدت على خير المصيبة ماكان معاي عربي أبدا وأبويا كان يكلمني يقولي أكيد معاك عرب سوريين ولا كدا ولا كدا و أنا أقول أيوه أيوه و في نفسي أقول لو تشوف جالس مع مين حترجعني الرياض دغري هههههههه

وحدة أمريكية قروشت أم أمي كل شوي تقول بالعربي شكرا شكرا نزلت قبلها من الباص قالت شكرا أيش تقول لها دي !!
ولا فاتكم وحدة جلست تزعق ومعصبة عشان ما أدوها غرفة لوحدها يا أمي أنتي جاية مع بنتك مدري أختك وماتبغي معاها !! عموما خليتهم كلهم يختلصوا و أنا مارست هوايتي الجديدة التأمل في الساعة و الفرشة و الزخارف الجميلة فيها هههههه

بعد ساعتين في الغرفة الي كانت مطلة على المسبح نزلت أصور شوية في الفندق ماشاء الله من كبره ماقدرت ألفلف عليه كله

أدوني كبون عشاء بس ماكانت نفسي مفتوحة لكن ماكان في شي أسويه قلت ياولد روح تعشى صراحة كان بوفيه مفتوح لذيذ جدا بالرغم من أنو كل الي أكلته جناح دجاج تندوري وشوية رز

جاء موعد الباص الي حيودينا للمطار و أنا من قبله مزعج الأمن عند البوابة أقول له جاء دحين ؟ لا لسى يا باشا !! طيب جاء دحين ؟؟ لسى يا باشا !! طيب جـ .. لسى بأه يا باشااا

انا جيت المطار 11 الليل الرحلة كان موعدها الأساسي 12 أتريهم غيروها لـ 2 وغيروها مرة ثانية لـ 3 وفي النهاية الظاهر أقلعنا 4 و نص تقريباً !

المشكلة أني خلصت الإجراءات بسرعة ورحت للبوابة لقيت أبو ملز منتظريني هناك :p

المكان كان هادئ جدا خرجت كتاب وقعدت أقرأ شوية جو اثنين شيبان خواجات بس وربي مرة أعجبوني جلس الرجال مع حرمته قامت خرجت كتابين لها وله وقعدوا يقروا ! شكلهم كان تحفة ماشاء الله

أنا ماقدرت أتحمل كان في مضاربة بين واحد و وحدة هم من عمال المطار ينظفوا الحمامات أو شي من هالقبيل فا الظاهر ان الحرمة نظفت حمام الرجال وعصب الراجل ومافي الا سب وشتم الله يهديه !

الساعة 1 ماقدرت اتحمل فا جلست ألفلف في ديك المنطقة و طلعت هبالتي في أوج حالاتها بس ماكان في أحد عشان يشوفني ويبوس يده وش وظهر ولله الحمد :p

أخرتها دخلونا صالة ثانية ومازلنا ننتظر ! كنت أبغا أصور بس أنحشرت المنطقة الحلوة كان فيها بنات والمنطقة الثانية الماليزين وصعبة تقعد تصور وعائلاتهم فيه فا كنسلت الفكرة مع أنو الصالة كانت حلوة طبعا مافي مقارنة بين خرابتنا و مطارهم !

المهم رحت ألعب بـألعاب البزورة وهنا ظهرت هبالتي مرة أخرى ولكن كل البشرية شافتني ههههههه كان في عجوز بريطاني قدامي أحسه يقول الله يخلف على أمن جابتك ، بس ما عليه أهم شيء أنبسطت

هذا الجهاز روعة رسومات تلونها + حدائق تنظفها ووو شي ممتع ومفيد للأطفال

المهم رجعت أقرأ لحد ماجت 4 ودخلونا الطيارة

ركبنا الطيارة قالوا 8 ساعات ونكون في مطار كوالالمبور إن شاء الله ، الطيارة كانت شبه فاضية فا مافي إلا قوة تسدبح ونوووووم

[ ماليزيا ]

و وصلنا ماليزيا ولله الحمد ، شكرا لمصر على الرحلة الحلوة في خطوطها الجوية ^_^

المطار كان أروع بكثييير من مطار القاهرة والتنظيم فيه يقتتتل ماشاء الله ، ركبنا الباص الي يوصلنا لصالة الأمتعة و الجوازات .

وصلت عند الجوازات هنا

خلصت إجراءات الجواز وبالمناسبة للي ميتين على ابو يبن شفت يابانيين كثير كذا أفواج أفواج الظاهر دوبهم وصلوا أحسن أحسن أنا شفتهم عالطبيعة كيييي كيييكيي

رحت صالة العفش لقيت عفشي جاني على طول والحمدلله

3 قطع وكان عندي وزن زايد بس حبايبنا المصريين مشوني فيها

رحت بعدين أصرف شوية من الفلوس لعملتهم ” رينقت ” المصيبة أنو 600 ريال = 500 رينقت وقتها سعر العملة طايح

خرجت بعدين استنى ولد بنت عمي سالم قعدت يمكن ساعة زمان إلا وجاء أخذني ورحنا لشقتهم ..

البقية و أول أسبوعين في ماليزيا أكمله في التدوينة الجاية إن شاء الله

للي يحب يتابعني أول بأول على تويتر إن شاء الله

Abdullah Saeed – Twitter

تحياتي

ودعواتكم يوم الأثنين القادم أول كلاس ليا في معهد الإنجليزي