يدغدغني!!

السلام عليكم ورحمة الله وبركاته

كيف الحلوين الأمامير ؟؟ ههههه المهم دا الأسبوع الحمدلله كان الإنتاج جيد جدا وغير متوقع!

كنت أظن سابقا أن الرسم يرتكز بشكل رئيسي في تطويره على ثقة الشخص، عشان كدا كنت أكره مفهوم الموهبة الي يحط في دماغك أنو أنتا تولد محدد و مقولب ومُعلب تنفع لكدا ولا ماتنفع والي طبعا رأي يمثل جهل شديد وسطحية مسطحة في أبسط مفاهيم القدرات الإنسانية و نمذجة الدماغ وطبعا عشان ما أكثر لكاعة وتنقلب مدونة تمبلر نخش في الموضوع ههههههههه

الهرجة أنو بصراحة رجعت ثقتي بنفسي وبقوة! الغريب كيف تحولت رؤيتي للموضوع أول كنت كل ماتجيني فكرة أأجلها لأني أحس أنو ماحقدر أسويها دحين الموضوع تحول لتحدي أنو أكيد حقدر وأحاول أطبق الأفكار مباشرة و (أتحمل طول وقت التنفيذ) ياشيخ من قوة الحماس أقول حخلص العمل مثلا في يومين أقوم أخلصه في ساعتين عشان ما أقدر أسيب الفوتوشوب والتابلت من يدي مثلا آخر عمل حق “يدغدغني” قلت حسيبه كدا ثلاث أيام أخلصه بمزاج وأغير شوية في التعابير لحد ما أرسي على بر .. خلصته في ليلة ههههههه طبعا مسألة الثقة جاية من أني قاعد أشوف تطبيق أفضل من الي أنا أقنعت نفسي أنو دا أنا مستوايا .. نفس الشي ينطبق على متعلم الرسم الجديد، دائما راح تحس أنو شغلك رووووعة في البداية بعد يوم ترجع تشوف شغلك حتبدأ تلاحظ الأخطاء (شيء جيد جدا) لكن لذة ذاك الشعور القديم (شغلي يجننننننن  ) راح يحفزك أكثر على التجربة مجددا والتعامل مع الأخطاء بموضوعية، بغض النظر طبعا عن مستوى تطورك وملاحظتك للأخطاء .. الإنسان كائن عجيب!

عموما رسومات دا الأسبوع كان المفترض تكون برضو تدريب على المناقا لكن حاولت أحول صورة واقعية لشخصية أنمي و أشوف أيش يجي مني ..

 

أول رسمة ألهمتني أياها شخصية Ryuk في مسلسل Death Note

 

التانية كانت المفروض تكون رسمة أنمي – لدي الصورة – بس غيرتها كتير فا أختفت الملامح

الثالثة والأخيرة رسمة – لدي الصورة– طبعا قصة الصورة أنو خالد (ولد خالتي) كنت أصوره في سطوح بيت جدي (2008 الظاهر) المهم وحطيت كتكوت على كتفه فا بدأ يضحك ويقول كلام مو مفهوم من الضحك، اتضح بعدين أنه يقول “يدغدغني” يقصد الكتكوت هههههههه طبعا أنا عجبتني الهرجة وقت ماكان يضحك وصورتها والحين حاولت أرسمها بشكل كارتوني عشان أتدرب على تعابير الوجه.

[ أضغط عالصورة لمشاهدتها بحجم أكبر ]

الأسبوع دا حتفرغ شويتين للقراءة أحتاج شوية ترويق وحرسم رسمتين تقريبا وحده لأختي (غيرانة ليش ترسم خالد بس) و وحده فكرتها حتعجبكم أكيد إن شاء الله أخليها مفاجأة 

طبعا بغض النظر عن مستوى الشغل دحين ورضايا عنه، عارف أنو فيه اخطاء وبديت اشوفها. لكن المهم بالنسبة لي في دي المرحلة أني حوقف أقول للناس مستوايا في الرسم تراجع، النقطة دي بالنسبة ليا تكفي. أخيرا بديت أرجع اتمرن عشان أرجع للمستوى الي كنت فيه وأحسن إن شاء الله.

 

تحياتي

5 Replies to “يدغدغني!!”

  1. اهلين، اضغطي على كلمة – دي الصورة – حطيت عليها رابط الصور الأصلية :good:

    طبعا الهدف مش رسم صورة حقيقية عشان كدا ما اهتميت بالتطابق، لأنو الهدف أتعلم رسم شخصياتي الخاصة مستقبلا :as27:

  2. هههههه يدغدغني

    جميله جدا ماشاء الله عجبتني طريقة الملامح وزاوية الرسمه ..

    *.. على فكره اذا عندك دروس حلوه لزوايا

    الرسم حطلنا هيا الزوايا مجننتني شوية :as16:

    الرسمة الوسطانية ممم ما حسيت انو مره عجبتني يمكن لو لونت العين بس يتغير الشكل كليا

    كدا في مساحة كبيره بيضا ..

    وبس ..

    إلى الأمام سر 😀

  3. اهلينا فاااتتتيييمما هههههه في دروس كثيرة في اليوتيوب والديفيدي الي حطيته من قبل الدرس الثاني عن الزوايا برضو :good:

    بالنسبة للرسمة الوسطانية فعلا مافي توازن بين الأبيض والأسود حنتبه لهالنقطة المرات الجاية بإذن الله :as31:

    تشكرات 😀

  4. بجد تسلم ايدك مستوى الرسم ممتارز وبعدين كفاية الروح اللى قراتها فى كلامك ادتنى دفعة وشجعتنى انى اتعلم
    شكر

    اخوك اسلام دهب

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *