نمذجة معبد إغريقي

السلام عليكم ورحمة الله وبركاته

زي ما قلت لكم راح أحاول أكتب أكثر في المدونة، التدوينة دي حاجة خفيفة لحد ما أنتهي من مشروع النمذجة دا و الـ flipbook التاني إن شاء الله.

الـ flipbook تقريبا خلصته بس وقفت شويتين مع ربشة الإختبارات واشرح لأخوانك ..إلخ إلخ وأنا ما أعرف اشتغل عليه إلا في الظهرية عشان زاوية إضاءة الشمس على الغرفة مناسبة جدا حتى أقدر أرسم وأشوف الورقة الي تحتها (الفليب بوك عبارة عن دفتر صغير حوالي 150 ورقة وترسم فقه ورقة ورقة لحد عشان تتحرك الصورة “مفهوم الرسوم المتحركة بشكل بسيط”) وللي ماشاف الفليب بوك الأولاني دا هوا

عموما زي ماقلت لكم حشتغل على واجب مادة 3D Maya Essentials الي هو نمذجة معبد إغريقي.

طبعا اختيارهم ذكي للموضوع لأنو تصميم المعابد الإغريقية مبسط جدا في الأشكال الأولية مثلثات أو اشكال اسطوانية .. إلخ أنا خلال دراستي من البداية قاعد أركز كيف يشرحون الأدوات في البرامج زي الفوتوشوب والإيلستريتور التطبيقات ذكية ومفيدة جدا لفهم الأدوات ناقصهم مدرس حليوه زيي ههههههه

المهم أنا بديت فيه وشطحت شوية عن المطلوب وكثرت التفاصيل بس من باب أنو أجرب كمان الأدوات التانية والحمدلله مرة مرة استفدت كانت فرصة أراجع معلوماتي في النمذجة خصوصا أني ماقد أشتغلت على المايا من قبل وكنت بصراحة متخوف منه شويتين يعني مقارنة بالسينما فور دي المايا أكثر تعقيد في توزيع الأدوات وفهم علاقتها ببعض. طبعا وقت كتابة دي التدوينة حطيت بعض الصور على الفيسبوك وردت عليا وحدة من الكلية تقول لي ترى كان مطلوب مننا استخدام نظام نمذجة معين في العمل وانا استخدمت في دا العمل نظام تاني فا حضطر بعد ما اخلص دا ارجع اسويه تاني بالنظام الي طلبوه الكلية إن شاء الله.

الآن حرفق لكم بعض الصور من داخل العمل لحد ما أكمله إن شاء الله وأحطه بشكل مفصل وايش الأدوات الي استخدمتها بإذن الله

الصور مشوهة لأنو ماسويت لها تصدير أو تصيير “rendering” لمن اخلص العمل كلو حزبطها إن شاء الله

 

تحياتي

 

4 Replies to “نمذجة معبد إغريقي”

  1. جميل جدا ماشاء الله .. الله يوفقك وييسر لك .. حلوه حركة انو تروح وانت مستعد ومجهز امورك

    😀

  2. ماشاء الله تبارك الله ..
    واجهة البرنامج معقدة جداً ، شي جميل منك انك قدرت تاخذ فكرة عن كثير ادوات اساسية فيه بغض النظر عن واجهتة اللي تنحش الواحد ^__^
    بالتوفيق ان شا الله اخي عبدالله سعيد

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *