عيد عبدالله سعيد

السلام عليكم ورحمة الله وبركاته

كل عام وأنتم بخير وعساكم من عواده يارب، وربنا يبلغنا رمضان القادم بأتم صحة وأسمى غاية وأقوى إيمان بإذن الله

الأعمال في رمضان كانت قليلة جدا لأني تفرغت كثيرا للقراءة وعلى آخر رمضان جاني إنهيار عصبي من كثرة المشاوير في الصباح والمسا هههههه الحمدلله، بس استغليت الوقت في المشاوير وخلصت كم درس صوتي كنت مأجلهم. 

أول رسمة رسمتها تقريبا قبل رمضان، فكرة وطنت في بالي أنو ليش لمن الواحد يبغى يعبر عن الحب يرسم قلب (طبعا الموضوع له بعد منطقي وتاريخي من علاقة العاطفة بعضلة القلب و حتى رسمة القلب المعروفة “♥” ) فا قلت خليني استعبط وأرسم الدماغ الي دائما يكون هو الي يطرد أو يُخمد الشعور العاطفي في مفهوم الناس له، يعني من قوة الإنحراف أو الإنضباط العقل صار هو الي يعشق هههههههههه عموما سويت الرسمة وحبيت أخليها لطيفة جدا بحيث ماتعطي إنطباع مفهوم الذكاء المرتبط بالعقل أو الدماغ أكثر من المفهوم العام للعقل أنو الشخصية الذاتية بكل مافيها.
نسخة الفيسبوك حبيت أدلعها شويتين وأضفت لها لمسة خاصة

من يوم ما دخل رمضان وأنا عندي عادة سيئة جدا، أنا فطرةً ما أعرف أنام وأنا أفكر يعني لو في موضوع في بالي لا يمكن أنام، لذلك دائما لما أبغى أنام وأنشغل بالتفكير لو أضطريت أحاول أفكر بموضوع أهبل عشان أفقد اهتمامي تدريجيا وأنام على غفلة! .. من بداية رمضان وأنا صاير استحضر المواضيع المهمة إستحضارا، يعني كأنو عباطة أنو ما أبغى أنام رغم إني ما أنسدح إلا وأنا منهك تماما لكن بسبب التفكير أقعد أتقلب ساعات وأحيانا أكمل إلى اليوم التاني! الرسمة التانية جت زي كدا لسى يادوبك أبغى أنام جت ريكس في بالي وقعدت اتأمل بعض المواقف وقلت ليش ما أرسم لها رسمة؟! وهات أفكار للرسمة هههههه المضحك في الموضوع أنو غرفة النوم مش هيا نفسها الغرفة الي فيها الكمبيوتر فا صاير أروح للكمبيوتر أقول حرسم بس سكتش للفكرة وبعدين أرجع أنام ولمن أرجع أقول حقوم أرسم بس الراس وبعدين أرجع أنام وعلى دا الحال لحد ماخلصت الرسمة رايح جاي من غرفة لغرفة هههههههه 

استعنت في دي الرسمة ببعض المراجع واستفدت منها كثير .. أنصح أي واحد يبغى يتعلم بأسرع طريقة يكون له مكتبة للتعابير والزوايا والشخصيات يجمعها من الأنمي الي يشوفه وكل مايبغى يرسم يراجع دي المراجع ويستفيد منها عشان يطور مهاراته خصوصا في التعابير.

الرسمة الثالثة على أساس كنت ابغى اتقدم خطوة جديدة في الرسم وأرسم شخصيتين مع الخلفية بس الوقت الضيق + أنو لسى أجرب برنامج جديد ماسمح لي أخذ راحتي و اتبحبح في التنفيذ لكن عموما النتيجة لا بأس بها، مش راضي عنها لكن لا بأس، إذا ماهي خطوة للإمام حتكون وقفة تدفع العمل الجاي خطوات بإذن الله. لأني بصراحة محروق على دا العمل بالزات المفروض كان يكون أحسن خصوصا أني ملاحظ الأخطاء الي فيه دحين بس أبغاه يفحس في قلبي مزبوط عشان اتعلم صح << وحش 

وأخيرا دا عمل أنيمشين جديد، من تقريبا 2010 وأنا وقفت تمرين على الأنيميشين بالرغم من أني كنت مازلت في بداياتي بس بصراحة كانت عندي رهبة من التجربة لكن مصادفة حملت سلسلة دروس للمايا وكان من بينها درس حركة المشي فا قلت خليني أشوفه (مجرد متابعة للدرس بدون تنفيذ) بس لمن شفته حسيت أنو أقدر أسويه يعني مافيه الصعوبة الي كنت متخيلها قبل، رغم أنه كان ومازال شغلة متعبة وتاخذ وقت طويل يعني الثانية الواحدة الي اشتغلت عليها أخذت أكثر من 5 ساعات (24 فريم = الخطوات الرئيسية في حركة المشي بعدين نكررها على حسب مانحب) بس عموما أرتحت كثير وكسرت الحاجز وراضي بالنتيجة الحمدلله واستمتعت جدا بتنفيذها 

الحين إما أني راح اكمل السيارة الي ماخلصتها أو أني راح أرسم رسمة جديدة .. شكلي حرسم الرسمة أول حاجة خفيفة بس بحاول أبني شخصيتي الخاصة بإذن الله وأحس لساتني مو مستوعب اسلوب الأنمي أحتاج وقت أكثر معاه.

نشوفكم في وقت تاني يا عسولين

7 Replies to “عيد عبدالله سعيد”

  1. ما شاء الله يا عبدالله ، وانت بخير وصحة وسلامة ..
    وجعلنا الله وإياكم من العائدين الفائزين ..
    عجبتني رسمة الدماغين الحبيبة ههههه مرره حلوة وفكرتها يعني جميلة ..
    والبقية جميلين أيضاً ما شاء الله ، استمر ياعبدالله 🙂
    بالتوفيق حبيبي 😀

  2. عيدك مبارك يا عبد الله.. أعجبني كثيراً تطورك الملحوظ في الرسم.. أقترح عليك رسم الإبتسامات الموجودة بمدونتك.. أولها http://asaeed.ws/blog/wp-includes/images/asaeed_smilies/asaeed(17).gif

    ثم تنتقل لرسم الشخصيات الكرتونية المعروفة بإسلوبك.. يعني لو كنت أنت من عهد إليه برسم شخصيات كرتونية كالمحقق كونان مثلا.. فكيف كنت سترسمه؟ ❓

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *