طريق الألف ميل : استراحة محارب

السلام عليكم ورحمة الله وبركاته

كيفكم يا حووولللووويين على وزن هوولووين بما انكم شلة موررعبييين هههههه معليش لازم شوية هبالة عشان أمرن الكيبورد 

الموهييم بحمدلله قررت أأجل الكلية كمان سمستر وشكلو كدا حتتأجل لبداية السنة الجاية إن شاء الله لأسباب كثيرة من بينها أني بصراحة خايف على درجاتي!

على عكس ماكنت في الثانوي من يوم مابدأت الكلية وأنا مهتم بشدة بأدائي ودرجاتي والحمدلله نسبتي كانت عالية مقارنة بفصلنا وبقية الفصول كمان يعني زي ماتقولون أنا “مصطفى” حق ماليزيا هههههه

المهم السمستر الجاي في ضغط شديد في المواد خصوصا عليا أنا لأني حكون جاي ولازم أخذ مواد جديدة إضافية ما أخذوها دفعتي الي كملوا بشكل طبيعي فا قلت يا ولد أستغل الوقت وتمرن من دحين على الواجبات الي حتاخذوها وبيني وبينكم أنا بديت فيها قبل كم أسبوع قبل ما أقرر أني حوقف على أساس قلت لو جيت متأخر أكون على الأقل سويت كم واجب وبالتالي ما أخسر درجاتي.

طبعا هرجة الدرجات ما أدري ليش يمكن عشاني دافع لدي الدراسة وبالتالي حاسس بقيمة الفلوس وما أبغى أفرط فيها << أبو حضرم في أوج طاقته .

أو يمكن عشان دا مجال أحبه وأنا رجال يعشق التحدي فا ما أبغى أنهزم في المجال الي أنا اخترته وحبيته!! المهم أني من جد شاد حيلي يختي عليا أجنن! 

عموما دا مشروع flip book  الي هو دفتر وترسم عليه وبعدين تقلب الأوراق عشان تتحرك الصورة .. تعبت مرة عشان ألاقي لي دفتر مناسب رحت جرير وكل المكتبات مالقيت دفتر صغير مو مسطر أقدر أشتغل عليه أو فيه ورق يكفي لأنو كلها صغيرة أو لونها مو أبيض أو مسطر أو بس 50 ورقة!

فا أبويا راح مطبعة وزبط لي كم دفتر الحمدلله وشكرا لبابي << برضو يختي عليا أجنن 

طبعا هرجة المشروع دا أنو عندنا مادة اسمها 2d Animation الي هي تدور حول مفاهيم التحريك بشكل مبسط والـ flip book مجرد واجب أول أسبوع زي ماتقولون إحماء مو مطلوب فيه أي اهتمام بالرسم والأبعاد وو مجرد سوي شي يتحرك حتى لو بدون قصة عشان كدا أنا ما أهتميت كثير فيه خصوصا انو وقتي كان ضيق جدا لأني كنت أبغى ألحق أخلصه وأنفذ واحد تاني (المفروض نسوي اتنين كل واحد مو أقل من 100 ورقة مرسومة خلال أسبوع ) طبعا المشكلة أنو في الأسبوع دا عندنا 5 مواد تانية (أنا حتكون تقريبا 7) يعني تخيل أنو المفروض تسوي اتنين في يوم واحد تقريبا! عموما أنا على وشك أخلص التاني وبعدين برجع أزبط الي خلصته عشان في فريمات من جد مشوهه بسبب العجلة وبعدين أرجع أرسمهم كلهم بقلم الحبر الأسود (حاسس بالمشوار الطويل ؟ )

 

المهم دي المادة راح ناخذ فيها مبادئ التحريك مشاريع بسيطة مثل هذا قروب من كلاسي الي فات سووه

دا المشروع أعطوهم وقت مناسب وقسموا الشغل بين مجموعة طلاب أظن هو المشروع التاني بعد الـ flipbook

ومشروع مثل الكرة النطاطة أو كرة مع ذيل وو عبارة عن مشاريع تشرح مبادئ التحريك الـ 12 أنا قد بديت في كل دا زمان لكن على برنامج Maya فا ححتاج وقت اتمرن ازبطها على الورق وبشكل ممتاز فا حركز الأشهر الجاية اتمرن على دي المادة مع المواد الأخرى.

 

عندنا كمان مادة 3D Maya Essentials الي هي تتكلم عن مبادئ برنامج Maya وعمليات النمذجة ومشروعها الأخير تسوي دبابة حاليا أنا بديت أراجعها وأتعلم من أول وجديد عن طريق سلسلة دروس رائعة جدا من هنا تقدروا تحملوها “بالإنجليزي” Maya Essential Training – click here

حاليا خلصت دروس النمذجة في دي السلسلة بسوي تطبيق سريع وبعدين برجع أكمل الـ flipbook الأخير عشان أرجع تاني أطبق واجب أول أسبوع لمادة الـ Maya إن شاء الله.

 

عندنا كمان مادة Drawing For Animation دي أصعب مادة في دا السمستر الشباب مرة يشتكوا منها الظاهر لأنو مدرسها مرة مُتعب كمان، درسني مادة المنظور رجال عبقري وفاهم مرة بس شرحه مش تمام تحتاج تسأله كل شوية طبعا وقتها أنا الي كنت أضحي وأطفش أهله عشان يوضح كل شي هههههه عموما المادة دي لها مشروعين نسوي concept شخصية روبوت وطبعا الموضوع فيه تفصيل شديد كيف حيتحركوا  أيش مكوناتهم وترسمهم بأكثر من زاوية وبالمنظور وترسم لهم مشاهد والأسلحة حقهم كيف حتصير ووو .. فا أنا مخصص وقت كبير لدي المادة كمان.

 

في مواد حتكلم فيها لاحقا وحتكلم بالتفصيل عن كل مادة في وقتها بإذن الله دحين بس أبغى أكتب أي هرجة عشان ما أسحب على الموضوع والفكرة في أني أتواصل بشكل أكبر في المدونة 

المرة الجاية حجيكم بتطبيق أول أسبوع على برنامج Maya إن شاء الله 

5 Replies to “طريق الألف ميل : استراحة محارب”

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *