رسومات فنية بالنكهة اليابانية

ههههههههه طبعا العنوان ما أحاول أقلد احد ابدا =p

السلام عليكم ورحمة الله وبركاته

الأسبوع دا تركت مودلينق السيارة وجلست أرسم انمي! بصراحة ثقتي في قدرات الرسم انهزت كثير ومشكلتي صرت ما اتحمل وقت عشان اجلس اتمرن مقهور أني ما أزبط الرسمة بسرعة فا قلت ياولد بطلك بكبكة وارجع تمرن 

والحمدلله بديت افتح مانقا Bleach الي تعجبني رسوماتها مرة واحفظ الصفحات الي اشوف فيها شي ابغى ارسمو وكدا جمعت لي كم صورة وبديت ارسم منها اتمرن على الرسم ومنها اتعلم على اسلوب الأنمي كمان 

التجربة كانت ممتعة جدا في البداية كنت أحاول ارسم اجزاء من الوجه يعني العين بس أو الفم بس وكدا ولأني كمان قاعد احاول استعجل النتائج تنرفزت كثير عشان مو قادر ازبطها لكن قلت ياولد جرب ارسم رسمة كاملة وشوف بعدين والحمدلله كانت النتائج أفضل مما توقعت صحيح اخذت وقت طويل لكن دقة الرسم كانت أفضل بكثير مما كنت اظن من نفسي. صحيح عكننت في آخر رسمة حق ايتشيقو بس استفدت كثير منها برضو وتعاملي مع التابلت تحسن أكثر برضو ولله الحمد. وبالمناسبة الرسمة الي فوق في المصغرات كانت أول تجربة لكن مانشرتها فيها اخطاء كثيرة.

حاليا حستمر كمان اسبوع زمان في التمرين عالرسم وبعدين حرجع للسيارة وحتكون آخر مشروع على المايا إن شاء الله لأنو حمر على أغلب الأدوات بيها، التركيز حيكون على الرسم والكونسبت آرت إن شاء الله. طبعا غير أني استلكع كل شوية والتاني واسيب كل شي واجلس اقرأ طول اليوم ولا فجأة اقوم أكتب في المدونة التانية ..إلخ المزاج حاقة قميلة أوي ياقدعان هههههه 

 

نشوفكم على خير

14 Replies to “رسومات فنية بالنكهة اليابانية”

  1. ماشاء الله. مره كويس. إلى الأماام :as15:
    وشكرا على مشاركتك لنا بالدروس والتجارب*افكر ابدأ أتعلم ذاتيا*

  2. أهليين ركاد مشكورة ويالله شدي الهمة مافي أحسن من التعليم الذاتي وعلى قولتهم إسأل عبدالله سعيد ولا تسأل أحد بعده هههههههه 😀

  3. مبدع :as4:
    بس حاب اسألك ترسم عالفوتوشوب ولا الالستريتر وهل هو رسم مباشره ولا ترسم على ورق وتأخذه بالسكنر وتعيد عليه عالجهاز

    وكمان سؤال اخيير ايش الاداه اللي تستخدمهاا جربت ارسم بالفرشة تعقدت علماً بانو عندي تابلت بامبوو بن ابو صغير

  4. مازن لا رسم مباشر على الفوتوشوب عن طريق التابلت، ارسم سكتش أولي وبعدين ارسم التفاصيل بدقة
    وانا استخدم الفرشاة الدائرية الأفتراضية ما اغير فيها اي شيء غير حساسية التابلت (تتفعل تلقائيا لمن استخدم التابلت) وبالفعل الرسم بالتابلت في الفوتوشوب متعب جدا في البداية لكن مع الممارسة تتعود وحط ببالك أنك حترسم كثير وتمسح أكثر عشان تخلي الخطوط ناعمة يعني مش ترسم خط واحد وانتهينا لا حترسم خط فوق خط فوق خط لحد ماتوصل للسماكة المناسبة والشكل المناسب 😀

    كل التوفيق حبيبي

  5. ماشاء الله عليك ..

    الرسمات قمه في الدقه .. من صج انت متوحش رسم

    تحياتي ياعقري زمانك .

  6. ماشاء الله تبارك الرحمن 😎
    أعمال جميلة جداً ..
    .. نبغى نشوفها ملونه ان شاء الله .. ~

    سؤال : فرشاة رقم كم تستخدم ؟

    شكراً (:

  7. يااااااااخي لنتا رسمك جبار!!
    خلاص ما تعمل مانجا خاصه بيك و خلاص هههه :as31:
    بس سؤالي هوا ليش ما تلون الرسمات!!

  8. عروس البحر .. مشكورة من ذوقك ولساتنا في بداية الطريق 😀

    ساره .. والله حاليا أبغا أركز على الأبيض و الأسود أكثر من التلوين لأنو الهدف أحسن قدرات الرسم ولسى يبغالها شغل :as15:

    كوو .. بطلي عبط انتي بالزات هههههههه لمن أوصل لمستواكي أفكر في الموضوع :as19: :as15:

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *