بشار و أنا

السلام عليكم ورحمة الله وبركاته

ساعات أحس أنو لو في دي المدونة روح كانت إما إنها راح تكرهني موت، أو راح تحوبني موت في حالة كانت روح هبلة! صاير ما أكتب إلا لمن يجيني أرق ولا لمن تكون نفسيتي تعبانة يختي عليها ولا لمن يجيني داك الشعور الي مايخليني أشعر بشيء وأبغى أكتب عن شعوري تجاه عدمية الشعور الي خلّف تدوينات بالهبل لم تنشر وبعضها غير قابل للنشر!
لحسه مو ؟

عموما للأسف الشديد قبل أسبوع وزيادة كم يوم سويت عملية جراحية في فمي المقدس اسمها “قطع ذروة” (يوجد صورة مقرفة للخندق الي انحفر في فمي ) العملية كانت بسبب إهمالي لسني الجميل الي انفلق من 7 سنوات تقريبا طبعا أنا كنت مطنشه لحد ما بدأ لونه يتغير فا سويت حالة إستنفار عشان اكتشف انو الشغلة مضروبه ضرب جامد وماتخارج بدون عملية ! الحمدلله خلصتها وعلى أساس اليوم الصباح (الساعة دحين 3:40 صباحا) أروح أفك الخياطة. أيوه صح ليش للأسف الشديد ؟ عشان عادة لمن تجيني حالة عدمية الشعور أسكر اللمبة حق الغرفة وازبطلي كدا ابريق شاي معتبر واجلس اشرب في صمت وانا متكي على الجدار .. تخيل كدا تقعد 4 ساعات بدون تفكير ولا نت ولا حاجة مجرد شاي وبس! أوم الفلة ياشيخ بس عشان الجراحة ممنوع أشرب أي شي حار

طبعا في الليلة الجميلة دي عندي أرق مش أكتر ولو اني تعبان نفسيا حبتين تهي تهي  << مو كدا الناس يتعبوا نفسيا يا ابني مو كدا 
في حال لسى ماقفلت الصفحة في وجهي حابب اسوي لكم أبديت للمشروع الي كلمتكم عليه حق سوريا.

حاليا تقريبا انتهيت من جزء كبير منه، تعلمت أشياء كثييييير واستفدت جدا منه، يكفيني أني تعرفت على برنامج زي الأفتر افكتس وحاسس أني لو كدا مخمخت عليه حقدر اطلع بأشياء أفضل بكثير بدمج المهارات البسيطة الي أعرفها في الفوتوشوب والثريدي و الأفتر. وعازم بإذن الله بعد ما أنشر العمل أنزل دروس لأهم العناصر والأساليب الي استخدمتها منها طريقة رسم مثل الخلفيات الي رسمتها عالفوتوشوب وكيف رتبتها عشان احركها على الأفتر افكتس .

مقهور بس أنو ماكان عندي خلفية كافية عن كيف راح أنفذ العمل لما بديت أخطط له، يعني في أشياء كنت جاهل تماما كيف حسويها على الأفتر لكن اخلصها عالفوتوشوب بعدين انقلها للأفتر وافكر كيف حسويها والحمدلله أشياء كثيرة طلعت أحسن مما كنت أتوقع، ياشيخ العمل كله كنت حسويه أبسط بكثير من النتيجة الحالية! والشي الي يحمس أنو دا كلو وأنا بالعافية اعرف البرنامج ودا أول عمل ليا فيه، يعني كأنك تقول أو تصميم ليا على الفوتوشوب الي حتشوفوه بعدين هو أول تصميم ليا على الأفتر. كيف يجي أحمس ؟

حاليا حخلص آخر مشهدين من العمل وبعدها حيبقى ليا مشهدين مش صعبين لكن حياخذوا وقت حق أبو يومين لكل واحد لأنو انيميشين، ولو اني بصراحة ماحسوي انيميشين انيميشين يعني حاجة حقت أبو أمشي العمل هي حلوه مش بطالة بس مو شغل يريح ضميري الأنيميتوري . قاعد احاول أخلص بأسرع وقت لانو الموضوع صار مزعج كل ماشافني أحد أو كلمت أحد عنو قعد يضحك ويقول بشار حيموت وسوريا راح تتحرر ويسوا دستور وحينتخبوا واحد وأنتا لسى ماخلصت ههههههه العمل بشكل عام هو تجربة فنية أكثر من أنو نتاج لدراستي لأنو كل الأشياء الي استخدمتها هي أشياء تعلمتها ذاتيا، وأتمنى أطلع بشي قد المقام رغم كل الظروف الي أحاطتني وماقدرت اوديها البريد ..

عموما على قولة براين آدمز .. تو يو آي ويل ألويز ريترن .. ويريفير يو ستاي أيل فايند ذا واي.

اشوفكم على خير يا حلوين، أذن الفجر

10 Replies to “بشار و أنا”

  1. ماشاء الله يا عبدالله
    مستواك تطور وصار افضل من اول
    انت الشيء الوحيد اللي اتذكره من ايام 2009
    قبل لا اترك التصاميم وكذا ..
    على فكرة كنت اكلمك على الايميل بس شكلك نسيتني
    الان توجهت للأخراج على القيمز وكذا برأيي انه افضل
    واوسع ان يطلع الواحد فيه ابداعه بالتوفيق يا عبدالله
    صديقك القديم عبدالعزيز

  2. اهلين عبدالعزيز كيفك يا عسل، الحمدلله على كل حال 😀 ودعواتك وربي يوفقك وييسر أمرك

    وريف شكرا لكِ أقدر جدا اهتمامك :good:

  3. ما شاء الله عليك….العمل رائع وممتاز بالرغم انك تقول انك ليس عندك خلفية عن البرامج ودى بدايه ممتازة

    أنا متخصصة تو دى انيميشن وعملت بالكارتون سنين …بشتغل على برنامج التون بوم للتو دى انيميشن

  4. السلام عليكم ..

    رائع جدا استاذ عبدالله ..
    كنت بالنت ادور على دروس في الافتر افيكت ..
    فخطرت في بالي .. ممكن تساعدني فيه ..
    توي مبتدأ .. حملت البرنامج و ثبته وطقطقت عليه حبتين ..
    بس بادور على دروس اساسيات وما لقيت .. اذا عندك او تلني عليه اكون مشكور لك
    واذا كان انجليزي يكون افضل ..

  5. السلام عليكم ورحمة الله

    ما شاء الله عليك مبدع دائما .. من فتره طويله ما دخلت وزرت موقعك ولا شفت اخر تطوراتك .. لكن صدقا ما شاء الله عليك ..

    استخدمت مؤخرا اكثر من برنامج للمنتاج ،، بس مع الاسف لاني ما زلت حتى الان ما اعرف اصمم ولا استخدم الفوتوشوب باتعب كثير في المونتاج وهذا احد الاسباب اللي خلتني اوقف كثير ..

    فيه برامج كثير حلوة وفيه برنامج مكمل للافتر افكت ممتاز جدا لكن تحتاج كمبيوتر ماك .. عشان كذا بانصحك يا مبدع تفكر بجديه في موضوع الماك مع العلم ان الماك ممتاز جدا في الميديا ،، وصاحه ولك وللزمن..

    تقبلني بين عالمك

  6. صباح/مسا الخير أستاذ عبدلله..
    كيفك؟ نفتقدك.. وتخيل قد إيش بتفيد العالم حتى لو تركت المدونة من زمان!
    يارب تكون بخير وحياة حلوة. ونشوفك في الجنة يارب.
    كل التوفيق والمُنى يا صديقنا

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *