القرف والبطرة!

السلام عليكم ورحمة الله وبركاته

طووويب .. انتهيت من الرسمة الي بديت فيها من التدوينة الي راحت (حق العين) 

كانت الفكرة معقدة أكثر ومقرفة اكثر بس صراحة حبيت اخلص بسرعة لأنو الهدف كان تجربة حركة أنو أرسم بدرجات الرمادي أول وبعدين ألون وبصراحة مرة مرة مريحة، لأني أول كنت أرسم بالألوان مباشرة زي دي الرسمة

فائدة الرسم بدرجات الرمادي أنك بدل ماتركز في الألوان تركز أكثر على درجات الإضاءة والظل وبعدين تمخمخ مزبوط على الألوان عن نفسي حبيت هالأسلوب مرة وحستخدمه دائما إن شاء الله لاني ذقت الويل في الرسمة حق الوردة ورسمات تانية غيرها. لمن تلون مباشرة وماعندك خبرة كافية العناصر تكون مشعترة درجاتها بشكل كبير لأني انشغل عن الإهتمام بدرجات الألوان للألوان نفسها وايش اختار، فا مع الأسود والأبيض التحكم اسهل بكثير خصوصا لو حددت من بدري مفاتيح الدرجات يعني نِسب تشبع الألوان زي كدا مثلا

عموما في أفكار كثيرة حرسمها بعد ما انتهي من المشروع الجديد إن شاء الله .. ومشروعنا الجديدة نمجذة لامبرقيني على المايا بإذن الله .. حتاخذ وقت طويل وربنا يعين الأسلوب الي حنفذها بيه جديد عليا (قاعد أطبق دروس) وبإذن الله أخلصها وأسوي لها ريندر وكل حاقة وبعدين اعرضها إن شاء الله.

تحياتي

عبدالله .. والأقر على الله!

 

7 Replies to “القرف والبطرة!”

  1. مو فاهم هرجة التلوين 😀 😀
    بس الله يوفقك بس ما اعرف حسيت رسمة الوردة احلى << يا رب ما انضرب :as7: :as7:
    في انتظار الباقي :as31:

  2. محمد الصويغ .. مشكور حبيبي البلوبرنتز حق السيارة جاهزة انا مارسمتها تعبتني شوية لانها مو مضبوطة تمام في التفاصيل بس الحمدلله ماشي فيها :as34:

    موديدوديييي ههههه صرع أمي اسمك تصدق أول مرة أحاول انطقو ههههههههه طيب يا حبيبي شوف مثال كدا
    http://i50.tinypic.com/spyn1i.jpg

    في البداية ارسم الأساسيات بدرجات الرمادي بعدين الونها بالفوتوشوب. لكن في رسمة اليد على طول بديت تلوين مارسمت بالرمادي أول فهمت كيف؟ مالو دخل بأسلوب التلوين ولا الفرش المستخدمة بس تكنيك معين لتقسيم خطوات التنفيذ. لو رجعت رسمت اليد بالرمادي بعدين التلوين حختصر وقت كثييير من الوقت الي جلست ارسمها فيه لانو نصو ضاع في الترقيع :as26:

  3. اخوي وش الالوان اللي تستخدمها للرسم وهي الرسم بالكمبيوتر ولا حقيقة ؟؟

  4. انا حتى الأن ما إستخدمت هادي الطريقه… أحس بعد ما ألون بيها الألوان نتيجتها حتكون باهته و غير حيويه :as7:
    على ايت حال أحاول أجرب أستخدمها بعدين مو دحين.. مع أنو أنا عن نفسي حبيت رسمه الورده مرا كتير :as14:

  5. عبدالله العنزي .. الرسم عالكمبيوتر طبعا ^^

    كوو .. والله هي فعلا بتطلع باهتة حبتين لكن مع شوية معالجة عالفوتوشوب تتزبط. لكن ما أظن حتزبط لو سويتيها على SAI بدون ماتنقلي الملف عالفوتوشوب بعد ماتخلصي عشان تزبطي الألوان هناك براحتك أكثر بحكم أنو الفوتوشوب متخصص أصلا في المعالجة أكثر من الرسم 😀

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *