شوية تحديثات (1)

السلام عليكم ورحمة الله وبركاته

يعلم الله شو مشتائلكون كتير كتير 

عموما المفروض أني أقوم أخلص واجب رسم على المنظور وقبله أروح أصرف مصروف الشهر الجاي بما أنو الدولار مزبط نفسه من امس لكن فجأة حبيت أجي أهرج معاكم شايفين قد أيش احوووبكوووم ههههه واحد مرة ما تغير هههه 

عموما آخر تدوينة كانت حول تسجيلي في الكلية وبصراحة كتبت بعدها تدوينات حول الكلية لكن ماكنت أكملها لسبب أو لآخر وبيني وبينكم من آخر تسجيل فيديو حبيت موضوع التدوينات المصورة تريحك في الكتابة وتعطيك مجال تثرثر زي مابدك لكن عموما خلوني اديكم موجز بسيط بما أني على مشارف نهاية آخر السنة الأولى ولله الحمد 

عندنا في الكلية 3 سمسترات يعني 3 فصول في خلال أول فصلين يجمعون كل التخصصات الأنيميشين و الملتميديا و الجرافيك والرسم. الفصل الأول والتاني عبارة عن الفن بشكل عام 

عموما خلوني اتكلم عن المواد الي بناخذها.

History of Art – تاريخ الفن :

واحدة من أجمل المواد الي ناخذها، أنا أحب التاريخ بشكل عام فا كيف لو كان حول الفن وفكر الإنسان ؟ دراسة تطور الفن مهمة جدا بصراحة بديت احتقر فن هالزمان ! الي يشوف روعة ودقة و اتقان الإغريق وفن عمارة الرومان يُصعق ببساطة ! 

ولمن تدخل في عصر النهضة وما أدراك ما عصر النهضة أو Renaissance هنا يبدأ مخك يحتار بأي وجه حق تسمي نفسك فنان ! هههههههه خذوا نظرة على واحد من أهم النظريات في عصر النهضة والي انبنت عليها لوحات كثيرة منها لوحة العشاء الأخير الشهيرة لدافنشي وغيرها.

The Golden Mean or The Golden Ratio

النظرية حسابية لو تحبوا تبحثوا عنها أكثر من هون ( ويكيبيديا )

ومع تخيلك انو لوحة زي لوحة العشاء الأخير طريقة رسمها صعبه لأنك حترسم على جدار وتصبغ عليه مادة ولازم ترسم بسرعة قبل ماتجف المادة و الي يزيد الطين بله انو دافنشي ماكان خبير بهالأسلوب فا كيف ولد اللذين حسبها وضبطها !! الموضوع دا يطول جدا بحاول افصل تدوينة مستقلة عن الي اخذناه في مادة تاريخ الفن خصوصا عصر النهضة بما انه مليء بالنظريات.

Computer Graphic :

مادة لطيفة وخفيفة بندرس فيها برامج التصميم زي Illustrator & Photoshop أول فصل بندرس أبوسوليتور Illustrator والحمدلله بما أنو عندي خلفية فيه فا ماشي حالي زي العسل المواضيع كلها بن تول وكدا.

هذه الفاينل بروجكتز :

– تصميم بوستر إعلاني لحقلة موسيقية بالبن تول بالكامل مشروع الفصل الأول أضغط هنا –

اخترت سامي يوسف هنا والتصميم حاولت اخليه هادئ شوي رسم الوجه تعبني ما استخدمت فيه اي فلاتر رسمته قطعة قطعة والمخطوطة ورى جاهزة.

– تصميم بوستر إعلاني لفيلم بالفوتوشوب وشرط الفيلم يكون من الخيال الشعبي أضغط هنا –

هنا المفروض اختار قصة من الخيال العربي الشعبي وبحكم انو قصصنا كلها ام دويس وام الصبيان وشلتها ههههه قلت اختار من ألف ليلة وليلة والمدرسة ماليزية كانت متحمسة مرة مع قصة سندباد لمن قلت لها بختار من ألف ليلة وليلة فا قلت ولا تزعلي نخليها سندباد ياستي هههههه هذا البوستر لقصة سندباد مع طائر الرُخ.

Finished Art or Mock up :

المادة دي لذيذة جدا لكن مصيبتها انها تاخذ وقت ، كل الي نسويه عبارة عن تصميم تغليف منتجات أو كتب البوب آب. مهمة جدا لتخصص Advertising لأنو لمن تصمم مثلا علبة عصير جديدة تحتاج تسوي منها نموذج عشان يشوفه العميل وكدا فا هذه وظيفة المادة دي و تحتاج دقة متناهية لأنك حتقيس حتى النصف ملم ولو غلطت في القياس راحت عليك ههههههههه و القص وما أدراك ما القص تقعد مثلا ساعتين تقيس مزبوووط تجي للقص يخبص ويعدم أبو أم الشغلة عليك ! تعلمنا تصميم كتب البوب آب Pop up Books المادة ممتعة وتزيد مهارتك ودقتك في كل شيء تقريبا تصير ملحوس تدقق في كل شيء هههههههه

English Communication & skills – مهارات الإتصال :

المادة دي في الفصل الأول مُدرستها لطيفة جدا محلية المادة بصراحة شخصية متفائلة جدا ومتعاونة وخبيرة وتفهم الي تقوله، المادة عبارة عن تطوير مهارات المحادثة و البحث يعني كان عندنا في الفصل الأول مشروع نلقي خطاب لمدة 5 دقائق و  بحث حول موضوع اجتماعي ومن ثم نلقيه كمجموعة لمدة 20 دقيقة، والحمدلله عدى الفصل الأول على خير تطورت فيه بشكل كبير والفصل الثاني تفوقت ولله الحمد صراحة حاجة صعبة تقدم برزنتيشين باللغة الإنجليزية وأنا لغتي مش قد كدا لكن روح التحدي دفعتني قدما للأمام والحمدلله مجموعتي أخذت المركز الأول في الفصل الثاني .. الفصل الثاني كان عبارة عن دراسة لأساليب الإعلان المطبوع الأٌسس والقواعد وكيفية كتابة الإعلان وأيش الأفكار الأساسية والي تبغى توصلها، مادة ممتعة جدا العمل النهائي فيها كان تسوي إعلان سياحي وبعدين تقدم برزنتيشين حوله ماتشرح أيش مميزات العرض لا تشرح الإعلان وليش اخترت الكلمات دي وعن ايش تعبر وتطابقها مع الأسلوب الي اخترته وهكذا .. كان الإعلان الي رسينا عليه في النهاية حول اليمن والحمدلله أخذت العلامة الكاملة في هذه المادة ومجموعتي زي ماقلت اخذت المركز الأول والإعلان الي سويناه أفضل إعلان قدم للمُدرس في هذا الفصل منذ 2008 الحمدلله ^^

الإعلان النهائي بالعربية من هنا و الإنجليزية من هنا

Drawing :

مادة كنت خايف منها بصراحة هي عبارة عن رسم Still Life يعني تفاحة، قدر، سكين، جرة .. إلخ يحطون لنا المواد و يركزوا الإضاءة ويالله أرسم !!

طبعا كل كلاس في اسلوب مختلف مثلا مرة حطوا لنا كاسات قزاز وقالوا ارسموها بدون تظليل بس الحدود وخلوها متداخلة وكدا فا يطلع شكلها جميل، مرات نرسم مجسمات زي مثلا مربع، مثلث، مثلث داخله دائرة والمفترض مننا نتخيل الحدود حقه ونرسمها يعني انتا ترسم الي تشوفه قدامك والي داخل الجسم والي في الجهة التانية كمان بدون ماتشوفها هههههههه النقاط المهمة في دي المادة هي الظل كيف ترسم الظل بشكل محترم وكيف تشكل الأبعاد الثلاثة وتتلمس المنظور البسيط في العمل، لأنو اخذنا مادة في الفصل الثالث  عن المنظور فقط، لكن في دي المادة بشكل مبسط. مادة جميلة جدا وتطورت فيها بشكل حلو، ودي صورة لأول رسمة في بداية الفصل ورسمة الاختبار في نهاية الفصل الأول

الفصل التاني في دي المادة نفس الفكرة لكن رسم بالألوان وراح ارفق لكم عمل والحمدلله في هذه المادة الفصل التاني تفوقت بجدارة واخذت أعلى درجة ^^

للي يحب يشوف لوحات أخرى يزور المعرض من هنا

 

و راح اكمل البقية في وقت لاحق عشان بس عشان التدوينة طولت  ^^

الباقي هو الحماس حتكلم عن مادة الديزاين و رسم الشخصيات إن شاء الله

في رعاية الله حبايبي و .. حبتين 

11 Replies to “شوية تحديثات (1)”

  1. ماشاء الله موادك كلها أحلى من بعض .. خاصة تاربخ الفن 🙂
    تحس انك على صلة بأصحاب الفنون مباشرة جالس معهم يحكوا عن قصصهم وأسرارهم .. يعني مادة فيها روح أكتر من مادة تطبيقية بحتة .
    بالتوفيق يارب وزي ماقال عبدالله عقبال تدوينة التخرج 🙂

  2. بالضبط تاريخ الفن بالذات كنت اجيها وانا محضر ههههه حتى في كتب ممتازة جدا بالصينية المدرسة تقول لو احد مو فاهم يجي يستعيرها لأنو الغالبية يفهموا صيني صرت انا اخذ الكتب واتفرج على الصور لانو فيها تحليل لأسرار اللوحات كانت مادة رائعة بكل المقاييس يعني مادة تروح لها تسمع قصص والمدرسة ماشاء الله فاهمة وعندها خلفية قوية شو بدك اكتر من هيك! والله يسمع منكم يارب ^^

  3. :as10: يا الله دي النظريه قراتها في روايه شفرة دافنشي عنجد ابداع
    و ما شاءالله عجبتني الرسومات و الاعمال
    الله يوفقك يا رب
    😀

  4. السلام عليكم و رحمة الله وبركاته
    حيا الله عبادي :as4:
    ماشاء الله هذا كله في سنه الا شوي :as24:
    لا بس ما شاء الله عليك باين تقدم بالنسبة للرسم بشكل خرافي ماشاء الله تبارك الله :as31:
    و كذا انت تعطيني امل في الحياة انه ممكن اتحسن 😀
    و لوحاتك الي بالالستوليتر مره خطيره
    في لي عندك طلب اتمنى ماتردني
    ابغى درس عليهم الاثنين وقت ماتفضى
    بالتوفيق حبيبي :as14:
    في امان الله :as4:

  5. ماشاء الله عليك اخوي عبدالله، ربي يوفقك..
    انا حصلت مدونتك هذي من حسابك بتوتر، وانا من زمان حابه الرسم.. وكثير قالولي موهوبه مع انو انت ماتقول بالموهبه 😀
    المهم ياسيدي.. أنا حابه اتعلم ارسم، خاصة الالوان والتظليل..
    لذلك اطلب منك من بعد اذنك تسوي دروس لينا على البلوق.. ولو تستمر بكتابة مشوارك الجامعي بنفس طريقتك هذي اكون مره ممتنه..

    اخر طلب.. ممكن تكتب لنا التكستبوك اللي يقرروها عليكو.. لان تعرف، اللي راحت عليهم واجد 🙂

أضف تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *