23 مايو, 2010
كثرة حكي
الزيارات : 5,398
التعليقات : 56 »

السلام عليكم ورحمة الله وبركاته

في البداية أشكر كل الزوار والله ثم والله لكم معزة خاصة فردا فردا و بجد أتكلم

أعتذر عن عدم الرد لكل التعليقات في التدوينة السابقة لأن النت ماكان متوفر وقتها في الشقة .

بصراحة ما أدري من وين أبدأ ؟!!

كل الي سمعته عن ماليزيا مختلف تماماً عما وجدته هنا !

قبل ما أتكلم عن ماليزيا أحب أنوه أني شخص ما يشغل باله بالسلبيات ورؤيتي دوماً إيجابية و واقعية لمن أحب أتكلم عن شيء معين ولله الحمد , بالتالي ممكن كلامي يختلف عن نظرة كثير من الطلاب هنا .

أول ماجيت ماليزيا كنت في قمة اللامبالة !! لدرجة أنو قريبي قلي شكلك مو شكل واحد مسافر كأنك ما تحركت من حارتكم !

وهذا الشيء الي فعلاً كنت مستغرب منه !! ياااااااهوووو صح صح معايا درقم درقم << صوت النقر على راسي

عموما للأسف شعوري حول أني جيت بلد جديد وكدا ابدا ماحسيت فيه ، أوكي صح أنو في أشياء جديدة بس عادي مافي حماس !

كان أول أسبوعين في ماليزيا قمة الملل !!!! يا ترى لييييييش ؟

أولاً : أنا كنت ومازلت جدي جدا من ناحية الهدف من جيتي لماليزيا وكنت متحمس للدراسة أكثر من جيتي أصلاً !

ثانياً : صارت لخبطة في فهم عملية ” الفيزا ” وكيفية الحصول عليها من المعهد مما أخر عملية التسجيل  ( من ربشتي  ) .

فا بالعربي قعدت أسبوعين في البيت بدون لا شغلة ولا مشغلة ! و أنا لو تبغى تقتلني عيشني في روتين بدون هدف .

المهم بعدها قابلت حبيب قلبي ” منزرايا .. أنتا معاه ولا معايا ” و أختصارا ” منذر ” والي أعتقد أنه زعلان عليا بعد حركة في قمة الشيانة سويتها فيه بدون قصد

السكن في ماليزيا – كما شاهدت – هو غالبا على شكل مجمعات سكنية ( Condominium )

يعني مثلاً 6 عمائر كل عمارة 18 دور وكل دور فيه أكثر من 10 شقق ! هذا مثال من مجمعنا المفقع فكيف المجمعات الراقية ؟!

عموما منزر ساكن في مجمع قديم لكنه مرتب أكثر بكثير من مجمعنا ، يعني عندهم مسبح و ممشى و حديقة صعنونة و الأهم عندهم بقالات عربية ! أصلا المجمع تقريبا كله عرب عراقيين على ليبيين هدولا العوائل والبقية سودانيين على يمنيين طلاب فا المنطقة حبوبة شوية .

أما أحنا مجمعنا معدوم شويتن وهنا تكمن روعته !!

أنا أموت في المناطق الشعبية يعني بالنسبة لي الكندرة ولا الأندلس و المنفوحة ولا العليا !! مدري ليش !!

غير أنو منطقتنا “Sunway” حية بشكل رهيب يعني مثلاً احنا زي ماقلت مجمع مضروب الشارع الي قدامنا

مجمع “South Quay” فخم هو مجمع فلل مطلة على بحيرة وجمبهم ملعب غولف !!

فندق sunway

منتجع Sunway Lagoon المائي

سوق Sunway Pyramid

غير كدا الحي بشكل عام مرتب مرة مستشفى كبير جدا سوق كبير “Sunway Pyramid” على شكل أهرامات مصر حاجة تحفة صراحة .

حسيت أني قاعد أسوي إعلانات ههههههه .. عموما المنطقة جدا رائعة و أرتحت لها كثيرا و الحمدلله غير أنو الكلية الي حخشها إن شاء الله في نفس المنطقة جمب السوق دايركت .

وهذا الي خلاني كل ما أدور على شقة خارج المنطقة ما ارتاح لها و أشكر حبيب قلبي منذر تعبته معاي في البحث ، لدرجة أني كنت فعلا مهموم جدا بمسألة الغرفة .

نرجع لمنزرايا لمن كنت عنده سوى لنا غدوه معتبرة ماشاء الله بالنكهة السودانية .. تسلم يدك مونزير .

في النهاية لقيت لي سكن في نفس المنطقة “Sunway” ونفس المجمع الي فيه قريبي بس العمارة مختلفة أو الـ Block مختلف

sunway منطقة رائعة جدا ويملكها على ما أظن رجل أعمال صيني ، تقدروا تبحثون أكثر عنها من خلال موقعهم أو من الصور في قوقل وغيره .

نجي دحين للشعب نفسه !

ماليزيا عبارة عن خليط بين الماليزيين الأصل و الصينيين و الهنود و كلهم عندهم الجنسية الماليزية لكن طبعا تقدر تفرق بينهم دغري

منطقتي يكثر فيها الصينين بشكل ملحوظ و الصينين بشكل عام هم تجار البلد و الي خربوا أخلاق البلد البنات هنا شكلوا اللبس القصير عندهم عبادة !!

عموما الشعب حاله حال نفسه لكن الهنود في منهم المجرمين و الصينيين يلهفون فلوسك لو كنت “أهبل” لكن الماليزيين نفسهم أنا أختلطت بيهم في المسجد و المعهد مرة حبوبين

على طاري جماعة المسجد في ولد صغير دوبة يشبه الولد الصغير في فيلم UP  كأنهم ماخذين الشخصية منه هههههه نفسي أصوره بس أخاف أبوه يزعل .

و العرب السياح هنا كثر كل يوم لازم تشوف لك عائلة ، حتى مرة ولد صغير ماصدق شاف طخة عربية قام نقز علي وقال : السلام عليكم

في العاصمة كوالالمبور للأسف الإسلام شبه مخفي يعني عاااااادي جدا عند الماليزيين نفسهم هرجة الـ Boy Friend و الـ Girl Friend وحددت الماليزيين كونهم المسلمين أما الصينيين و الهنود ماعندهم مشكلة يخربوها .

فا عادي تشوف محجبات و أحضان وقُبل مع أصحابهم !! و أعتقد أن السبب في ذلك هو دخول الصينيين و الهنود وتأثيرهم على المسلمين ” في العاصمة ” أما في الضواحي الأمر مختلف جدا الإسلام أقوى .

الجميل أن المصليات في كل مكان لا يمكن يكون في سوق أو مجمع بدون مصلى و وقت الصلاة في الأسواق مثلا المصلى يكون عامر بالمصلين ماشاء الله .

لكن بشكل عام الي يدور على مظاهر الإسلام في العاصمة حيتعب .

Mee Goreng

بالنسبة للأكل  الحمدلله أكلاتهم الشعبية روعة و أغلبها تعتمد على الرز المطبوخ بالخضار مثلا :

Nasi Goreng Ayam

Nasi goreng ayam : الي هو عبارة عن رز مطبوخ بالخضار مع دجاج مقلي . الي يبغى يذوقها يروح محلات راقية لأنو الشعبية الرز حقهم خرافي لكن الدجاج يابس كأنو من عام حفر البحر !

Mee goreng : أندومي مكشنة مع البيض و الدجاج في بعض الأحيان وفوقها بصل مجفف ، لذيذة جدا جدا .

Roti

Roti : الشباتي ، لذيذ جدا جدا مع الكاري وفي عندهم روتي تلور شباتي بالبيض مع الكاري حاجة تووووحفة .

هذه الاكلات بشكل عام و طبعا في أكلات بالهبل الأكل الجاوي أو الأندنوسي و الهندي كمان يعني هرجة أنو مافي أكل مرة ما تخش المخ !!

و أنا أصلا أعشق الاكل الهندي حتى النخاع فا عايش حياتي هنا  . طبعا غير أنو كل أنواع المطاعم العالمية موجودة !

كمان عندهم الشراب الماليزي الرسمي على قولة مهند

أنا ماقد عمري شفت ناس يعشقوا منتج معين بقدر عشق الشعب الماليزي لمنتجات ميلو !!

حليب ميلو ، آيس كريم ميلو ، حليب ميلو بارد ، كاكاو ميلو ، بسكوت ميلو .. إلخ . مافي منتج لميلو إلا عندهم !!

و أغلب المطاعم مثل ماكدونالدز تقدم الميلو في قائمتها وبالشكلين الحار و البارد !!

في البداية كنت مستغرب وبعد أن جربته وقعته في حبه من أول جُغمة هههههه خصوصا ميلو آيس بااااااارد شي يُقتل  !

ماهي يدي عشان ماتنبسطوا وتقولوا الدبه أهو الدبه أهو :p

بالنسبة للصرفيات في ماليزيا زي السعودية تقريبا ماتفرق كثير لكن في الأكل رخيصة ، تخيلوا أتغدى في البرجين بـ 10 ريال

هذه وجبة عادية و دسمة ” صحن ماكرونة إيطالية ” و ماكدونالدز مثلا الوجبة بـ 9 ريال وتوصل 6 ريال لوجبة برقر السمك !!

و أعتقد أن السبب في ذلك أنو الشعب هنا الأم و الأب يشتغلون فا يجتمعون عالغدا في هالمطاعم مع بزورتهم فا مدام في طلب كبير السعر حينقص طبيعيا

لكن في الأكسسوارات الإلكترونية شوف السلخ

سعر صرف الـ 100 ريال سعودي قرابة 84 رينقت ماليزي و أكبر عملة عندهم الـ 100 أنا لمن أسحبها أتورط فيها مافي أحد يصرفها غير المطاعم الكبيرة !

كمان تصميم فلوسهم مرة عجبني ، غير كدا عندهم حتى الهللات يعني الهللة تقدر تاخدها من ورى خشمهم مو زينا في بنده ولا غيرها ياخذوها عنوة و يصرفونا بعلكة .

المواصلات وما أدراك ما المواصلات !!

روعة كوالالمبور بالنسبة لواحد جاي من السعودية ، تكمن في المواصلات !!

في كوالالمبور المواصلات داخل المدينة متنوعة مابين التكاسي و الباصات ( الي تجي في موعدها بالملم مو زي باصاتنا الي تجي قبل موعدها .. هي تجي أصلا ؟  )

كمان في القطارات بأنواعها !! أيوه القطارات 3 خطوط ! تقريبا كل منطقة في العاصمة أقدر أروح لها بالقطارات أو كما يسمونها بأنواعها ( LRT – KTM – Monorail ) و أسعار المواصلات زهيدة جدا

و الأعجب أنو لو انتا مشاويرك كثيرة تقدر تاخذ بطاقة بـ 150 ريال وتركب في الباصات و الـ 3 قطارات بعدد لا محدود ! ولو أنت طالب خصموا لك نص السعر !!

كمان كون المواصلات تمشي بالثانية شيء يساعدك بقوة أنك تضبط يومك .

خلونا أحكيكم كيف يمر يومي العادي  ..

في البداية أقوم الساعة 5:40 الصباح قبل الفجر بـ 10 دقايق قبل الفجر ، وللأسف رغم أن المسجد في نفس المجمع ما أسمع الأذان !

عرفت قيمة الأذان هنا والله

نصلي الفجر وبعض الأحيان يلعب عليا الشيطان ويخليني أنام إلى 6:30 و أنا وياه في حرب و دعواتكم لي بالنصر .

بعد الفجر نجلس في قراءة من كتاب رياض الصالحين بعدين شوية دردشة مع الشباب و أطلع البيت أخذ لي دش

و أفطر لو كان لي مزاج وفطوري توست بالجبنة و عصير برتقال و كثير من الأحيان أنزل بدون فطور أفطر بس عشان أحزن على التوست يقطن !!

عاد التوست حقهم خرافي طري طراوة مو طبيعة نفسك تنام عليه خخخخ

المهم تجي 6:56 ألبس ملابسي و أخرج من الباب 7:00

طريق روحتي من البيت لحد محطة أنتظار الباصات.  1.7 كم

أوصل لراس الشارع 7:10 و أبدأ مشي لييييين موقف الباص كيلو و 700 متر مشي يعني تقريبا 20 دقيقة و أوصل على الساعة 7:30

أجلس أنتظر الباص رقم 76 عشان يوصلني لمحطة قطارات رئيسية وهي تقريبا أكبر محطة للقطارات ” KL Sentral ” الباص يوصل 7:35

أغراءات التكاسي في حال تأخرت عن موعد الباص الأول

بعض الأحيان أشتري موية و اتلكع في المشي فا أوصل 7:35 يكون الباص راح عليا فا أنتظر نفس الباص يجي 7:45 تقريبا أو أخذ باص تاني رقمه 63 يوصلني لمحطة رئيسية تانية ” Pasar Seni “

بس مشكلة الباص التاني أنه ياخذ وقت أطول في الوصول مع أن المحطة حقه بعد KL Sentral  بس لأنه يمر بطريق مختلف فا الزحمة تختلف وبالتالي ياخذ وقت أكثر !

80% من السيارات في الطرق صناعة ماليزية

المهم عادة أوصل لـ KL Sental الساعة 8:30 الوقت يكون بكير مرة يعني لو ركبت الـ LRT حوصل قبل مايفتح المعهد اصلا !

زينوا مجرى المياه برسومات على الجدران ، شوفوا الرسم على أصوله !

فا أقعد ألف لف شوية في المحطة و أركب القطار على 8:40 أوصل لمحطة KLCC و الي هي تحت البرجين على الساعة 9 تقريبا مش متأكد لأنو ممكن تفرق دقيقتين

مع أنو القطار يمشي بالثانية بس أنا متذبذب في دخول القطار من KL Sentral فا ممكن يكون في تنقص عن 9 دقيقة ولا دقيقتين .

المهم أمشي 500 متر تقريبا إلى المعهد يعني بالعربي المعهد يبعد عن البرجين 250 متر بس !!

عموما أمشي تقريبا عشر دقائق و أتأمل في الناس و العالم الماشية و النشيطة عالصباح والي يشتري فطور من البسطات في الطريق

ذكرتوني بتجربتي مع “الناسي لمك” فطور الماليزيين عبارة عن رز أبيض وصلصة حارة و سمك مجفف أنا ذقت السمك أنصرعت  قمت الله يكرم النعمة كبيت كل السمك و أكلته بدونه !

كنت أتمنى لو أخذت دجاج بدال السمك حيكون تحفة مع الصلصة ..

عموما وبكذا تقريبا أوصل للمعهد على 9:10 أجلس 20 دقيقة في الكلاس وبعدين يبدأ الأستاذ في التاسعة و النصف

بصراحة أستمتع جدا جدا في الدرس لأني في الحقيقة متعطش لتعلم الإنجليزية !

الجميل في الأمر أني كونت علاقة قوية بيني وبين المدرس و الطلاب نحدثكم عنها إن شاء الله في تدوينة لاحقة .

يدرسونا مدرسان أثنان واحد اسمو Simon و التاني Paul  كلهم من بريطانيا أصل و فصل الأول من ضاحية نسيت أسمها و التاني من مانشيستر. راح أفرد تدوينة تتكلم عن المدرسين الي قابلتهم و الي حقابلهم لاحقا إن شاء الله .

التدريس في British Council ممتع و مفيد أكثر مما توقعت ! نخلي الحديث عنه في وقت آخر إن شاء الله .

عموما أخلص الكلاس عالساعة 1 الظهر أصلي الظهر في المسجد الي ورى البرجين مسجد حلو و كبير ، مرة كنا جالسين أنا و منذر شوية نسمع إيقاعات و آهات  هههههههه بعدين رجال تكلم بالمالاوي يعني الإيقاعات زي الأنترو للإعلان عن شيء .

يمكن كان يقول أن الصلاة بعد قليل لأنو كان قبل وقت الأذان بشوي .

المهم بعض الأحيان بعد الصلاة أجلس في ( ELLZ ( English Language Learning Zone الي هي منطقة التعلم الذاتي أو Self Study هو عبارة عن كمبيوترات فيها برامج تعليم بالهبل و إنترنت و كمان أوراق أختبارات ذاتية لكل فصل تاخذه في المنهج .. الدراسة هناك ممتعة جدا ! <<  لا عاد تمتعون هالولد ههههههه

المهم أن وقت الرجعة مو منضبط لأنو حسب المزاج ، أنا دقيق في الروحة عشان ما أتأخر و يقول لي simon بكل استهبال Good Night Abdullah هههههههههه طبعا حسب وقت التأخير تكون الجملة ههههه

الحمدلله مرتين تأخرت و مرة غبت لأني قمت متأخر مررررررة و المصيبة داك اليوم نمت بدري مرررررررة لكن الحمدلله.

في الرجعة أروح لمحطة KLCC لآخر محطة الي هي محطة منطقتنا Kelana Jaya الطريق طويل جدا قرابة 40 دقيقة أو تقل مش متأكد لأنو كل طريق الرجعة من LRT إلى الـ Bus  أكون نايم فيهم ههههههههه

و يقال أني من قوة الرعب في وجهي لمن انام أتحول لميدوسا  عشان كدا أقوم ألاقينا مسوين حادث و الناس ميتين و متحجرين وفاتحين فمهم وعيونهم كأنهم شافوا حاجة مرعبة و سواق الباص يكون يناظرني و يأشر كأنه يقول ” يخرب بيتك ” طبعا وهو متحجر

المهم بعد ما أوصل Kelana Jaya أنتظر الباص والي ياخذ وقت طويييييل بين كل روحة و التانية يعني مثلا باص 76 يمشي كل 10 دقائق أما باص 23 و الي هو باص Kelana Jaya يمشي كل 30 دقيق تقريبا !!

عشان كدا ما أروح بيه الصباح .. المهم الباص دا ياخدني لييين تحت السوق حقنا Sunway Pyramid و نرجع للبيت بعد يوم طووووييييل وممتع ^_^

ترى في تكملة بس تعتب صراحة هههههههههه عموما أنام على الساعة 11 تقريبا بعد مذاكرة لذيذة .

في النهاية أتمنى أنكم تدعون لي بالتوفيق في مشواري الدراسي لسى ورانا كلية وزحمة و ربنا يعين

للي يحب يتواصل معاي زي ماقلت سابقا

Twitter + Tweitter Pic

سبحانك اللهم وبحمدك أ شهد أن لا إله إلا انت نستغفرك ونتوب إليك

أعجبتك التدوينة .. احفظها و شاركها مع اصدقائك !
  • del.icio.us
  • Facebook
  • Google Bookmarks
  • LinkedIn
  • StumbleUpon
  • Technorati
  • Twitter
, , , ,