Abdullah Saeed

السلام عليكم ورحمة الله وبركاته 

والله أول ماشفت الصورة حسبتها في مسجد الشيخ ابن جبرين قمت أدور اسم المسجد في الصفحة !! بس ماطلع هوا .. من جد يشبه له بس هذا أحسن شوية ، آآآآه مشتاق ! 

موضوعي مو فشخرة أو شوفوا يا ناس أنا انسان تقي وورع  .. إلخ زي ما أتفقنا مجرد فضفضة وتدوين مدونة مستدونة << أيييييش تبغى !!!

بصراحة من زمان نفسي أدخل حلقة تحفيظ قرآن كريم بس متخصصة في التجويد ، قعدت أدور و أدور مالقيت ! طبعا هذا الكلام بعد ما توظفنا في الرياز ، المهم لقينا حلقة جمبنا في الحي بعد صلاة الفجر المدرس واحد ماشاء الله عنده العشر قراءات و شارب التجويد شرب ماشاء الله فا استقعدت له ، المهم فجأة جات إجازة مدري أيش و أنقطعت عن التحفيظ شوية جيت برجع أدور الأستاذ مالقيته ! قالوا سافر

المهم مرت الأيام ورحت جدة ، وبدأ المشوار دورت في المساجد الي جمبنا مافي غير حلقات عادية ووقتها مو مناسب العصر أو المغرب  ، المهم و أنا خلاص قطعت الأمل ومشكلتي مشكلة لازم أحد يربطني أحد يشجعني ولا أهمل ..

المهم في أحد الأيام القميلة خرجت من المسجد بعد صلاة الفجر  و أنا من عادتي أقرأ كل الإعلانات و الأوراق وعلى قولة الشباب ( عبدالله لمن يشوف إعلان في مسجد يطالع في اسم المصمم أول بعدين يقرأ الإعلان هههههههههه  ) وأنا أقرأ طاحت عيني على ورقة ملساء بيضاء فيها بقعة وخرابيش سوداء << يمديكم على الوصف  .. المهم و أنا أقرأ فيما معناه أنو عزم جامع الفلاني بعقد حلقات تحفيظ للموظفين والكبار فعلى من أراد التسجيل التسجيل لدى فلان بافلاني هههههههه قمت درم درم درم <<  صوت المشي  رحت عندك ذاك الشيخ يااااااه ذكرياااات أيام ماكنت في سن السادسة كنت أحفظ القرآن على يديه  المهم قلت له لوسمحت أبغى أسجل في حلقة الموظفين قام طلع القلم و الورقة وسجل أسمي ورقم جوالي .. لحد هنا حلوووووو ..

رحت وأنا أزهوا فرحا و إنبساطا و أردد .. فاينلي !! << ??!!  معليش تجيني مرات من كثر اللخبطة بين اللغات الي عندي أتكلم مع نفسي بلغة ثانية المهم الترجمة : أخيرا !! 

جلست مبسووووط أسبوع ، ياهووو ماجانا أتصال أيش الهرجة !!

و أنا طالع من صلاة الجمعة الماضية ، طاحت عيني على ورقة ملساء بيضاء فيها بقعة وخرابيش سوداء  مكتوب فيها ( بعد المدري ايش الإصرار حاجة زي كدا سوينا الحلقة في الأيام التالية بعد صلاة العشاء !! ) أنا مو قمة الإنبساط أغمى عليا من الإنبساط << بكااااااااش

المهم و أستنى يوم الأحد على أحر من الجمر ، الي هو اليوم طبعا !!

قعدت من أمس أحفظ و أنا مشكلتي صوتي عااااااااااااالي لو أأذن في المساجد بدون مايكرفون أخلي أهل ينبع يسمعون الآذان  

المهم فا كنت قاعد أحفظ وبحماااااس وانسجااااااام مع الآيات وصوتي على الآخر في شقتي و كنت أعتقد في أي لحظة راح يطرق علي أحد الباب و أفتح وعينك ماتشوف إلا نجوم السماء  لكن ربكم ستر تحملوني .. 

المهم وجيت اليوم كمان أحفظ وشاد حيلي في التجويد قلت أبغى أبهرهم  ، وكل شوي يقول لي الشيطان أيوه صح وتصير المُميز حق الحلقة ويخلوك تمثل الحلقة وتقرأ في الحفل الختامي  و أنا أقول يا شوشو أنقلع دحين لا أحرق دمك وانتا تعرف كيف ( بيني وبين شوشو ) الغريب أنو البسة كانت تصيح تصيح لمن بديت أقرأ سكتت !! الظاهر شافت أن صوتي عالي مرة مارح توصل لصوتي قمات ريحت حنجرتها  

المهم و أجلس بعد صلاة العشاء في الجامع أستنى الحلقة تتجمع عشان أجي وكدا وما أضيع الطريق !! شفت الهرجة طولت ما أحد تجمع ياهووووو ؟!! قلت لا ياحلو أكيد نظامهم كل واحد يحفظ ويجي يسمع !

شوية وأنا أسمع لنفسي شفت اتنين يدرسوا انجليزي ازعجوني قمت قمت اقدم شوية .. إلا أشوف مجموعة صغيرة من الآباء كبار السن متجمعين قلت أكيد دولا مجموعة لوحدهم حيجو يسمعوا بعدين عند الشيخ ! 

شوية ياهووو حافظ أبو الحزب صمممم بتجويده بكل شي أبغى أسمع و أمشي ! فيني نوم بشكل لا تتخيلوه حتى كنت بخربها و أنا راجع من الدوام أوقف على جمب و أنزل الكرسي و أنام خايف ما أوصل البيت حي من قوة النوم !!  بس دق علي واحد صوته حلو ، حبيب القلب مازولا أول حرف من أسمه ( أبو سيف )  المهم رحت لاتنين شباب يدرسوا نفس كتاب الإنجليزي الغريب

سألتهم وين حلقة الكبار ؟ 

توقعاتكم أيش قالوا لي ؟؟  

أشار لي أحدهم .. إلى حلقة الآباء ( ما أحب أقول شيبان ) !!!!!!!!!!!!!!!  ياهو قلنا حلقة كبار وموظفين بس مو شيسمو !! 

رحت أستأذنت من الأستاذ وجلست .. عرفت بنفسي وعرفوا بنفسهم وكمل أحدهم القراءة ، كانت صورة عبس  و أنا كنت حافظ من بداية البقرة أبغى أبدأ من هونيك .. كانت قراءة مُتعبة بحكم سن القارئ أعطيه فوق الخمسين سنة  

كان أصغرهم عمره 37 سنة  !!

أنا مو تحطممممممت الــتحطممممممت .. جاء دوري في القراءة ، أستحيت صراحة ، مهما كان قراءتي أفضل منهم بمراحل وهذا بفضل البابا و الماما الي أهتموا بأني أتربى في حلقات تحفيظ القرآن منذ الصغر  .. طيب الحين والحل لو قريت صح أو رتلت راح أحطمهم راح أحسسهم أنو أصغر منهم أحسن منهم و أقلل من مقدارهم  ، قريت بشكل عادي جدا طبعا ما غلطت نفسي عشان أرضيهم !!

لكن قرأت قراءة عادية ، وحافظ أنا الي يقروه و الي حفظوه و الي بيحفظوه ولله الحمد  ، طبعا أنا كنت مأمل على تسميع وشغل جامد ، صعب أني أفرد عضلاتي قدام أبائي يعني أغلبهم أكبر من أبوي نفسه ! بعد الحلقة كلمت المدرس ووضحت له كل شي قام قلي احفظ الي نحفظه وسمع لي الي تبغاه بعد الحلقة إن شاء الله  .

ياااااااااااااااه ، أكثر ماعجبني وشدني كلام احدهم ، يقول بلهجته لكن ندبلج لكم :  أنو الواحد كان يقرأ ويغلط ومايعرف غلطه أو مافي أحد يصحح له والحمدلله شفت الإعلان و أنبسطت على الآخر وقلت أخيرا وبعد هذا العمر راح نقدر نحقق أمنيات باننا نحفظ القرآن عند أحد متفرغ ويصحح لنا . 

وين البزورة الي يسوو نفسهم كبار على حلقات التحفيظ !! ، يسمعوا ويشوفوا كيف مثل هؤلاء يسعون لحضور مثل هذه المجالس !

والله ما أنكر تقصيري مع كتاب الله و أتمنى أن الله يساعدني أن تكون هذه الحلقة بداية أستعادة ماحفظت ، وتكون سبب لأرتقائي في جنان الخلد إلى الفردوس الأعلى بإذن الله . 

موقع جدا جدا جدا جدا رااااااااائع :  من هنــــا

اختاروا ( المزيد ) و بعدين من فوق ( نوع المصحف ) وبتلاقون المصحف الثالث من اليسار بالتجويد جدا رائع  

أشكر الأخت : mars.marttin من منتديات إنشادكم الي طرحت موضوع فيه هذا الرابط جزاها الله أعلى الجنان . 

محبكم أبو كلام كثير 

عبدالله  ، و الأقر على الله .