24 يونيو, 2009
كثرة حكي
الزيارات : 1,915
التعليقات : 26 »

السلام عليكم ورحمة الله وبركاته 

- دخلنا عالم الـ 3d بقوة ولله الحمد بعد دورة أبوصالح حبيب الألب مازولا والنتائج كانت مفاجعة بالنسبة لي  لمزيد من المعلومات يرجى زيارة هيدا الموزوع : أغلى الكنوز و المزيد .. || الفانوس الذهبي    راح أضيف تدوينة قريبا بشكل مفصل وأتكلم عن البورنامق كزالك إن شاء الله . 

- النت قافل في البيت له ٤ أيام تقريباً  في البداية دقينا على الدعم الفني تبع أول نت قام يقول لي مشكلة في المملكة كلها  و المصيبة أني رحت المكتب وشبكت وزي العسل  !! قمت قلت معليش عديها ياعبدالله أنت كريم و أنا أستاهل  ، أستنيت اليوم التاني ودقيت قال لي مافي مشكلة  ؟! المهم حدثت البيانات في المودم ونفس الهرجة دقيت عليهم تاني وماخليت في الي رد عليا ضلع سليم  والرجال طلع أخلاق خصوصا خامة صوته خشت مزاجي بالعرض ههههههههه  المهم قال لي من عندنا سليم وزي العسل الظاهر المشكلة من الخط نفسه  !! 

قمت قلت يالله ياعمي وجبت كهربائي في اليوم الثالث ووصل ليا سلك من العلبة دايركت على غرفتي .. ونفس الهرجة  !! المهم المصيبة أنو الخط بأسم خالي وتعرفون ثقالة دم الأتصالات و الرجعية الي هم فيها << عجبتني كلمة رجعية تحس أني ليبرالي هههههه أستغفر الله عموما لحد يومكم ماتزبط الوضع قلت ياعبدالله ياسعيد خليك شاطر و أديهم شلوت  فا كنت أفكر أروح لموبايلي ولا go  المصيبة أنو نفس الخدمة بس السعر مرتفع !! وماتدري عن الدعم كيف الي بالبيت عندي ماعمرو صار له شيء فا قلت لنفسي أصبر و وكلها لله وماعليك وادعي المولى ومد ايديك ..

 

- هذا الشهر آخر شهر لي في TOOT Studio دخلنا مع شركة جديدة ثانية والحمدلله ، وهذا الشيء مايقلل من شأن توت أو أني تزاعلت منهم .. إلخ بالعكس شباب توت نعم الشباب عشت معاهم أحلى الأيام بحلوها ومرها  وما أقولها مجاملة أو شيسمو ما أدري أيش لا والله .. لكن علموني أني دائما ما أرضى إلا بالأفضل وأخترت الأفضل إن شاء الله ، صحيح راح تفتقدون التصاميم الي التركيب فيها مجنون لأن توت متميزة بهذا الشيء حتى الآن وهذا الي يحلي التصاميم أكثر و أكثر ، لحد الآن أتذكر كلام القرني في بداياتي معاهم ( أنتا تفصل و أحنا نلبس )  وصدق قرناوي .. صحيح أني أنهلكت هلك يعني خلال الـ ٧ شهور الماضية أنا الوحيد الي كنت أصمم !! خلودي مسافر وصمين خرج وقتها قبل مايرجع تاني لكن كانت تجربة ممتعة .. بساطة أقدر أقول أن توت غيرتني ١٨٠ درجة دخلت عندهم شيء وخرجت شيء ثاني ..  وصدقت مامي لمن كانت تقول وقت ماكنا نتضارب كلامياً فيما معناه ( خالط الناس وراح تعرف مين أنت ) بحكم أني كنت المنعزل الغلبان  .. الحمد لله على كل حال  .. توت أعطتنا الكثير و أحنا ماقصرنا معاها إن شاء الله .. شوكرن خلودي سروجي أفتقدناك ووالله أني لك مشتاااااغ ، شوكرن محمد القرني ، شوكرن باسم الزهراني ، شوكرن العامري ولو أنك سحبت علينا ولا كأننا نعرفك ، شوكرن فايزة << السكرتيرة و خدمة العملاء ، شوكرن صمين والموعد في كوندليزا رايز وياقاتل يامقتول << شفرة بيني وبينه ، شوكرن للقمييييع حتى شوكرن لأخطر الي كان يشغل أبو أم جدي لمن أبغى أركب السيارة و أستحي أقول له صرف عمرك  ، شوووكرن علوي أفندي للأسف ماقدرنا نجلس معاك أكتر .. شو بحبكون كتيييييييييير كتييييييييييييييير وأنا على ثقة أن لتوت مستقبل كبير للغااااية وكان بودي أشاركهم النجاح المستقبلي وبإذن الله حنشاركهم بس بقالب مختلف  !! .. ورجاء من بعض الناس مايغارون جاي دورهم  .. 

 

- زي ماقلت أني أنتقلت لشركة أخرى ولو أنو مو أنتقال فعلي لأني معاهم من ٤ سنوات تقريبا ولا يمكن في يوم من الأيام أنسى أفضاله علي صحيح كل شي كان بمقابل لكن هذاك الإنسان إلى اليوم ماوجدت منه أثنين ياحظ الي بتاخذه هههههههه عموما أنتقلنا لشركة جديدة في أسمها قديمة في فريقها كلنا كنا مع بعض دوما و أبدا U Tech أو التقنية المتحدة ، بالنسبة لي هي أفضل من توت بنواحي كثيرة جدا إلا أن نقطة الضعف الوحيدة أن حركات توت في التركيب مفقودة هناك لكن بإذن الله راح نسد هذه الثغرة ويصير في تحدي قوي بيننا  وبين حبايبنا في توت  .. طبعا الشغل حيكون من البيت بعكس توت وهذه إيجابية في نظري ، قد تكون سلبية في نظر البعض ، عموما بهذه المناسبة طلبت جهاز جديد وماشاء الله جابولي جهاز أيش أقول مواصفاااااات خااااااااارقة ماشاء الله حيكون شوغوووول ” شغل “ حماااااااس بإذن الله مع أني مافتحته لحد الآن  ، لكن سيماهم في وجوههم .. عاد حيكون شغل جامد إن شاء الله مع حبيبنا سيسو ” cinema 4d ” وراح أنزل تدوينة مفصلة قريباً إن شاء الله .. 

 

- وطبعا بما أني راح أنتقل لشركة جديدة بالتالي في فرصة أنك تاخذ لك إجازة خفيفة تنشط فيها الدارات المخيخية العصبية  فا حناخذ إجازة على الرياض عند أهلي حبايب ألب ألبي .. شوبحبكوووون كتير كتييييير .. فا في الفترة ديك ( قرابة عشرة أيام ) أفلقوني أن فتحت كمبيوتر فا بالتالي أفلقوني أن فتحت المدونة ولا البريد لذلك جرى التنبيه 

 سيكون هناك الكسير و الكسير من التغطيات ترقبونا بعد الشيسمو الإجازة .

 

- البسس شلنا أبوهم وعالترحيل على إيران دايركت  جدتي من يوم ماولدوا وهي قالبة الدنيا فوق تحت ولا تبغاهم  بس أنا كنت مسوي لها قلق ماتبغى تزعلني  .. عموما السكرتيرة عندنا عرفت أنو عندي بسس وبعد ماوريتها صورهم  رجت أبو جدي ههههههههه وبيني وبينكم لقيتها فرصة نصرف البسس في مكان أمين خصوصا أنو عندهم قبائل متقبئلة من البسس  و أيش كمان ماعندهم النوع المدلع زي حقوني   قمت قلت خلاص خذيهم كلهم وودعتهم جلسنا نبكي و كمان نبكي ( تخيلوني أتكلم و أمط حلقي وبرطمي عن كلمة ” نبكي ” ) و أنا أقول لهم مش حنساكم وهم يقولون أبونا أبونا أبونا نحووبك مرررررة قد الدنيا و البحر و آسماكو و أنا أقول لهم و أنا كمان و قعدنا نبكيييي وبعدين كمان قعدنا نبيكي  .. عموما روشتهم ومن الصباح على المكتب و خلصنا   بس خليت ليا واحد بصراحة أقربهم إلى قلبي تحسونه أهبل وحليوه ههههههههههه .. يالله ربونا يعين بإذن الله كدا لمن نستقر لوحدنا نجيب لنا بسة شيرازية ولا رومية و آخر حلاوة 

 

* ملاحظة : أحبابي أعزائي الي ماوراهم لا شغلة ولا مشغلة ويبغوا يطفشوني بالتعليقات السخيفة و الرسائل الأسخف .. أقسم بالله مارح تهشو ولا تنشو فقط راح أتأكد يوم بعد يوم أن البقرنة موجودة في هذا العالم و أن في أشخاص تافهين ماعندهم هدف في حياتهم و .. مسخرة  ، ولأنكم ماتسوو شي ماتستحقون أتعب نفسي و أحذف تعليقاتكم الي فيها من السخف الشيء الكثير ، لكن بمجرد قلة الأدب وعشان خاطر زواري الأحبة وعشان عويناتهم الحلوة أنا آسف حضطر أوصلكم لمستوى إهانة مختلف بأني أحذف الرد .. 


شكرا لكل الأخوان و الأخوات الي يتابعوني و أوعدكم بدروس قادمة إن شاء الله و إكمال سلسلة البن تول بعد مانرجع بالسلامة إن شاء الله 

على فكرة الراجل الي مامنو أثنين مارح أقول أسمه لكن أبغى منكم الدعاء له بالتوفيق والسداد  لأن الي أنا فيه الآن بسببه بعد الله حبيبي ألبي نعمينو .. أووووه قلت أسمه .. سوحقن  

 

تحياتي

 

 

 

أعجبتك التدوينة .. احفظها و شاركها مع اصدقائك !
  • del.icio.us
  • Facebook
  • Google Bookmarks
  • LinkedIn
  • StumbleUpon
  • Technorati
  • Twitter